,,ერთადერთი კაცი, რომელიც იუსტიციის უმაღლესი საბჭოს რეფორმას არ ეთანხმება, მიხეილ სააკაშვილია", -განაცხადა ევროსაბჭოში ბიძინა ივანიშვილმა ერთ-ერთი დეპუტატის შეკითხვის კომენტირებისას, რომელმაც ახალი მთავრობა დაადანაშაულა, რომ ვენეციის კომისიის დასკვნას არ იზიარებს.
"ვფიქრობ, რომ თქვენ გაქვთ ისევ ცალმხრივი ინფორმაცია და ოპოზიცია ახერხებს, რომ სიცრუე გაავრცელოს ევროპაშიც. საქმე აბსოლუტურად პირიქითაა, ჩვენ მაქსიმალურად, თითქმის 100%-ით, შეიძლება 99%-ით, მთლიანად გავითვალისწინეთ ვენეციის კომისიის დასკვნა და გავითვალისწინებთ მომავალშიც. შესაბამისად, თქვენ არ გაქვთ ობიექტური ინფორმაცია. ჩვენ ვითვალისწინებთ სამოქალაქო საზოგადოების რეკომენდაციებს. თავად უზენაესი სასამართლოს თავმჯდომარეც თანახმაა ამ ტიპის რეფორმის გატარებისა. უკვე არსებობს ბატონი ჰამერბერგის შეფასებაც, რომელიც ადასტურებს, რომ რეფორმა არის წინგადადგმული ნაბიჯი და არის ძალიან კარგი", - განაცხადა ბიძინა ივანიშვილმა და აღნიშნა, რომ ერთადერთი კაცი, ვინც ამ რეფორმას არ ეთანხმება, არის სააკაშვილი, რომელიც ცდილობს კანონს ვეტო დაადოს.