საქართველოს პარლამენტის მუდმივმოქმედი დელეგაციის წევრები სტრასბურგში გაემგზავრნენ. დეპუტატები მონაწილეობას მიიღებენ ევროპის საბჭოს საპარლამენტო ასამბლეის საგაზაფხულო სესიის მუშაობაში, რომელიც სტრასბურგში ორშაბათს გაიხსნება.
23 აპრილს კი სესიაზე სიტყვით გამოვა საქართველოს პრემიერ-მინისტრი, რომელიც სტრასბურგში სპეციალური მიწვევით მიემგზავრება. ბიძინა ივანიშვილი ევროსაბჭოს საპარლამენტო ასამბლეის წევრების შეკითხვებს უპასუხებს.
პრემიერის ადმინისტრაციის ინფორმაციით, ევროსაბჭოს საპარლამენტო ასამბლეაზე, სიტყვით გამოსვლის გარდა, ვიზიტის ფარგლებში, ბიძინა ივანიშვილი ორმხრივ შეხვედრებსაც გამართავს.