"ნაციონალური მოძრაობის" ყოფილი წევრის მარიკა ვერულაშვილის განცხადებით, პარტიის გენერალური მდივნის ივანე მერაბიშვილის გვერდით დგომა დანაშაულია.
ვერულაშვილმა ამასთან დაკავშირებით სპეციალური განცხადება ცოტა ხნის წინ გააკეთა და აღნიშნა, რომ კონსტიტუციური უსაფრთხოების ყოფილი უფროსის დათა ახალაიას სოციალური ქსელით გავრცელებული წერილი ნამდვილად ახალაიას ეკუთვნის.
მისი თქმით, ივანე მერაბიშვილი მომავალში ძალიან ბევრ არასაასიამოვნო სიურპრიზს.
"მაქვს უტყუარი ინფორმაცია იმასთან დაკავშირებით, რომ გუშინწინ სოციალურ ქსელში გავრცელებული დათა ახალაიას მიმართვა ნამდვილად ეკუთვნის მას. უფრო მეტიც, ეს განცხადება, რომელიც სიურპრიზი აღმოჩნდა ბევრი პოლიტიკური ძალისთვის არანაირ კავშირში არ არის 19 აპრილს დაგეგმილ აქციასთან. უბრალოდ, ეს არის დათა ახალაიას საჩუქარი. მიმაჩნია, რომ დამსახურებული საჩუქარი იუბილარი ვანო მერაბიშვილისადმი", - განაცხადა ვერულაშვილმა.
მისი თქმით, მერაბიშვილი არ არის მიჩვეული სიმართლის თქმას, თუმცა მას ამის მოსმენა ძალიან ხშირად მოუწევს უახლოეს მომავალში.
ვერულაშვილის განცხადებით, "ნაციონალური მოძრაობის" კრახი საპარლამენტო არჩევნებში ივანე მერაბიშვილის დამსახურება იყო.
"მიმაჩნდა, რომ ამ დამარცხების შემდეგ, ის აღარ უნდა ყოფილიყო პარტიის გენერალური მდივანი, რადგან ეს ასე მაინც მოხდა, გადავწყვიტე, რომ ჩემი ადგილი აღარ იყო ამ პარტიის რიგებში. დღესაც ვთვლი და მაშინაც ვთვლიდი, რომ ვანო მერაბიშვილის გვერდით დგომა დანაშაულია", - განმარტა ვერულაშვილმა.
ამასთან, ვერულაშვილმა განმარტა, რომ რამდენიმე დღეში "ნაციონალური მოძრაობის" წევრი, თავდაცვის ყოფილი მინისტრის ბაჩო ახალაიას მამა, როლანდ ახალაია პარტის რიგებს დატოვებს.
რაც შეეხება თავად მარიკა ვერულაშვილს, მან პარტია მიმდინარე წლის 4 თებერვალს დატოვა