ევროპის საბჭოს საპარლამენტო ასამბლეის მონიტორინგის თანამომხსენებლები საქართველოში მართლმსაჯულების სისტემის რეფორმებს მიესალმებიან.
თანამომხსენებლები 22-26 აპრილს ანგარიშით სტრასბურგში, საპარლამენტო ასამბლეის შემდეგ სესიაზე მონიტორინგის კომიტეტის წინაშე წარსდგებიან და საკუთარ დასკვნებს გაახმოვანებენ.
როგორც მათ საქართველოში ვიზიტის დროს აღნიშნეს, რეფორმები მნიშვნელოვნად გააუმჯობესებს მართლმსაჯულების სისტემის დამოუკიდებლობის ხარისხს.
"უნდა აღინიშნოს, რომ იუსტიციის უმაღლესი საბჭოს რეფორმის გატარება უმრავლესობასა და უმცირესობას შორის კვლავინდებურად უთანხმოების საგანს წარმოადგენს. შესაბამისად, მოვუწოდებთ ორივე მხარეს, მიაღწიონ კომპრომისსა და შეთანხმებას იუსტიციის უმაღლესი საბჭოს რეფორმის გარდამავალ დებულებებთან დაკავშირებით, რითაც წარმოდგენა სასამართლო სისტემაზე, როგორც დამოუკიდებელ ორგანოზე, მხოლოდ გამყარდება", - განაცხადეს თანამომხსენებლებმა.
თანამომხსენებელთა განცხადებით, აღნიშნულ საკითხზე რეაგირება ზომების მიღება აუცილებელია.
მათივე თქმით, დაუშვებელია ამ პროცესის ამა თუ იმ ფორმით პოლიტიზება, ხოლო განხილვები ზედმიწევნით უნდა პასუხობდეს ევროსაბჭოს ადამიანის უფლებებისა და კანონის უზენაესობის სტანდარტებს.
აქედან გამომდინარე, თანამომხსენებლებმა ხელისუფლებას მოუწოდეს, შესაბამისი კანონპროექტის შედგენის პროცესში, ევროსაბჭოს შესაბამისი დეპარტამენტების ცოდნა და გამოცდილება გაითვალისწინონ.