საქართველოს პრეზიდენტი მიხეილ სააკაშვილი მზადაა, მთავრობას უფასო კონსულტირება გაუწიოს. როგორც მან "რუსთავი 2"-ის ეთერში, გადაცემა "პოზიციაში" აღნიშნა, კონსულტანტობას სთავაზობს როგორც მთავრობას და პრემიერ-მინისტრს, ასევე მომდევნო პრეზიდენტსაც.
მისი თქმით, მისი პირველი გეგმაა, 6-7 თვის განმავლობაში ყველაფერი გააკეთოს, რათა საქართველოს სუვერენიტეტი გამანადგურებელი დარტყმის საფრთხის ქვეშ არ აღმოჩნდეს. "პირველი - მე მაქვს გეგმა, რომ ამ თვეებში, 6-7 თვე ყველაფერი გავაკეთო, რომ საქართველოს სუვერენიტეტი არ დადგეს ამ განამადგურებელი დარტყმის საფრთხის ქვეშ. მეორე, რასაც გავაკეთებ ასევე, რომ ახალ ხალხს ბევრად მეტ ადამიანს გავუხსნა გზა პოლიტიკაში", - განაცხადა სააკაშვილმა.
მისი თქმით, საერთაშორისო ორგანიზაციებიდან სერიოზულ თანამდებობებზე შემოთავაზებები ჰქონდა, მაგრამ მისი სული საქართველოშია და სანამ საქართველო არ იქნება თავისუფალი ის ამ ბრძოლიდან არ გავა.
"თუ ამ მთავრობას ამ გამოცდილებას გავუზიარებთ, მე დიდი სიამოვნებით ვიქნები მათი უფასო კონსულტანტი. სიამოვნებით ვიქნები პრემიერის უფასო კონსულტანტიც ამ არჩევნების შემდეგ, ახალი პრეზიდენტის კონსულტანტიც. იმიტომ, რომ მინდა, რომ ჩვენი ქვეყანა წავიდეს წინ", - განაცხადა მან.
პრეზიდენტის თქმით, საქართველო უნდა იყოს ძალიან ფრთხილად, მობილიზებულები, რათ ქვეყანა წავიდეს წინ.