დღეს, 12 აპრილს საქართველოს მთავრობის კანცელარიაში აშშ-საქართველოს სტრატეგიული პარტნიორობის შესახებ ქარტიის დემოკრატიული სამუშაო ჯგუფის შეხვედრა გაიმართება.
შეხვედრას ქართული მხრიდან თანა-თავმჯდომარეობას გაუწევენ საგარეო საქმეთა მინისტრის პირველი მოადგილე დავით ზალკალიანი და იუსტიციის მინისტრის მოადგილე გოჩა ლორთქიფანიძე, ხოლო ამერიკული მხრიდან - აშშ-ს სახელმწიფო მდივნის თანაშემწის მოადგილეები თომას მელია და ერიკ რუბინი. შეხვედრაში, ასევე მონაწილეობას მიიღებენ ორი ქვეყნის შესაბამისი უწყებებიდან დემოკრატიის სამუშაო ჯგუფის წარმომადგენლები.
შეხვედრის შემდეგ მხარეები ერთობრივ განცხადებას მიიღებენ, რომელიც შეხვედრის შედეგებსა და სამომავლო გეგმებს ასახავს.
შეგახსენებთ, ეს გახლავთ აშშ-საქართველოს სტრატეგიული პარტნიორობის ქარტიის ფარგლებში გამართული დემოკრატიის სამუშაო ჯგუფის რიგით მე-6 შეხვედრა.