ევროსაბჭოს საპარლამენტო ასამბლეის მონიტორინგის ჯგუფის წევრები შეხვედრებს მართავენ.ამ წუთებში ისინი საპარლამენტო უმრავლესობის წარმომადგენლებს ხვდებიან. შეხვედრა თბილისის იუსტიციის სახლში მიმდინარეობს.
საუბარი სავარაუდოდ, საკონსტიტუციო და სხვა საკანონმდებლო ცვლილებებს შეეხება.
როგორც შეხვედრის დაწყებამდე პარლამენტის ვიცე-სპიკერმა მანანა კობახიძემ აღნიშნა, მონიტორინგის ჯგუფის წევრებს აინტერესებთ მდგომარეობა კონსტიტუციაში შეტანილ ცვლილებებთან დაკავშირებით.
მისი თქმით, შეხვედრის მონაწილეებს ზოგადად, კონსტიტუციის ჯგუფის მუშაობასთან დაკავშირებითაც ექნებათ კითხვები.
"მე, როგორც ამ საჯარო განხილვების კომისიის თავმჯდომარე - ამ რანგში ვესწრები შეხვედრას. ზოგადად, ალბათ მიმდინარე პროცესებზე და მიმდინარე საკანონმდებლო ცვლილებებზე ვისაუბრებთ. არ გამოვრიცხავ, რომ ვისაუბროთ პოლიტპატიმრებზე და იმაზე, რაც არის აქტუალური", - განაცხადა კობახიძემ.
მისივე თქმით, საპარლამენტო უმრავლესობა მზადაა, ნებისმიერ შეკითხვას პასუხი გასცეს.
მონიტორინგის ჯგუფის წარმომადგენლები უკვე შეხვდნენ საპარლამენტო უმცირესობისა და ფრაქცია "მაჟორიტარის" წევრებს.