"მიზნად, დამოუკიდებელი სახელმწიფოს აღიარება დასახული არ ყოფილა. ამაზე არც არავინ ფიქრობდა. მე მოწმე ვიყავი იმ განხილვებისა, რომლებიც მოსკოვში მიმდინარეობდა. მიზანი იყო ერთი - შეჩერებულიყო სისხლისღვრა. მაგრამ, ამის შემდეგ თბილისდან რევანშისტული განცხადებები გაისმა, სააკაშვილმა უარი განაცხადა საფრანგეთისა და რუსეთის პრეზიდენტების წინადადებაზე - დაზავებაზე და აფხაზეთისა და სამხრეთ ოსეთის სტატუსთან დაკავშირებით საერთაშორისო განხილვების დაწყებაზე. ჩვენ მზად ვიყავით სტატუსის განხილვა საერთაშორისო კონტექსტში დაგვეწყო. საააშვილმა კი განაცხადა - არავითარი განხილვა", _ განაცხადა სერგეი ლავროვმა ტელეარხ "RTVi"-სთან საუბარში.

მისივე თქმით, საქართველოს პრეზიდენტის მიერ გაკეთებულმა რევანშისტულმა განცხადებებმა მიიყვანა რუსეთის ხელმძღვანელობა იმ დასკვნამდე, რომ დამოუკიდებლობის აღიარების გარდა უსაფრთხოებისა და ამ ხალხებს სიცოცხლის გადარჩენის სხვა გზა არ არსებობდა.

"მე ვერ ვხედავ, რომ ახლო მომავალში გამოჩნდეს ისეთი ქართველი პოლიტიკოსი, რომელიც იტყვის: მორჩა, ჩვენ დავივიწყეთ ეს, ჩვენ მართალი არ ვიყავით. ზუსტად ასევე არ იქნება რუსი პოლიტიკოსი, რომელიც იტყვის: მოდით, ყველაფერი თავის წრეზე დავაბრუნოთ. შეუძლებელია ეს მოხდეს. როდესაც ამერიკელები, ევროპაში ჩვეულებრივი შეიარაღების შესახებ შეთანხმების გაფორმების კონტექსტში გვთავაზობენ ჩვენ ჩავწეროთ იმ საზღვრების პატივისცემა, რომლებიც 2008 წლის აგვისტომდე არსებობდა, ჩვენ ვპასუხობთ, რომ მათ შეუძლიათ ჩვენ არ დაგვეთანხმონ, მაგრამ ეს რუსეთის პრეზიდენტის გადაწყვეტილებაა", _ აცხადებს სერგეი ლავროვი.

შეგახსენებთ, რომ 2008 წლის 7 აგვისტოს, ღამით, რუსეთის ფედერაციამ დაარღვია საქართველოს დამოუკიდებელი რესპუბლიკის სუვერენული საზღვრები და მის ტერიტორიაზე ცხინვალის რეგიონის მხრიდან, როკის გვირაბის გავლით შემოიჭრა. რუსეთის ფედერაციამ საბრძოლო მოქმედებები დაიწყო ასევე რუსეთის მოსაზღვრე საქართველოს მეორე რეგიონში - აფხაზეთში.
რუსეთ-საქართველოს ხუთდღიანი ომის შედეგად რუსეთის ფედერაციამ საქართველოს ორი რეგიონის - აფხაზეთისა და ცხინვალის რეგიონის ოკუპაცია მოახდინა და ის მყოფი სეპარატისტების ე.წ. დამოუკიდებლობა 2008 წლის 26 აგვისტოს აღიარა.
დღემდე რუსეთის ფედერაცია უგულვებელყოფს 2008 წლის 12 აგვისტოს ცეცხლის შეწყვეტის, ძალების გაყვანისა და მათ კონფლიქტამდე არსებული დისლოკაციის ადგილზე დაბრუნების ხელშეკრულების შესრულებას, რომელსაც ხელი საქართველოს, საფრანგეთისა და რუსეთის პრეზიდენტება მოაწერეს. ამ ხელშეკრულების მიხედვით, რუსეთის ფედერაციამ თავისი სამხედრო ძალა 2008 წლის 7 აგვისტომდე არსებულ პოზიციებზე უნდა დააბრუნოს. ამჟამად, საქართველოს ეს ორი რეგიონი რუსეთის ოკუპაციის ქვეშ იმყოფება.