ექსპერტი თორნიკე შარაშენიძე მიიჩნევს, რომ დამოუკიდებლობის დღეს სამხედრო აღლუმის ჩატარების საკითხი პრემიერ-მინისტრის გადასაწყვეტიცაა. როგორც მან "ჯი-ეიჩ-ენთან" საუბრისას აღნიშნა, პრემიერმა თავის განცხადებაში იგულისხმა, რომ ქვეყნის სამხედრო ძალის დემონსტრირება დაზვერვისთვის დამატებითი "ლუკმაა".
"ამაში რა თქმა უნდა იმას გულისხმობს, რომ დამატებითი ლუკმაა ხოლმე დაზვერვისთვის სამხედრო ძალის ჩვენება. გააჩნია როგორ გამოაჩენ შენ შენს ძალას. როცა სხვა ქვეყანას აჩვენებ სამხედრო ძალას, თავისთავად ამბობ ყველაზე მაგარი ვარო და თავს ადარებ მას, მაშინ, როცა არაფრით მეტი არ ხარ მასზე", - განაცხადა შარაშენიძემ.
მისივე თქმით, რა თქმა უნდა, უფრო უკეთესია, რომ ქვეყანამ სამხედრო ძალა არ აჩვენოს.
საქართველოს პრემიერ-მინისტრმა ბიძინა ივანიშვილმა დღეს ჟურნალისტებთან შეხვედრისას აღნიშნა, რომ მისი პირადი მოსაზრებაა 26 მაისს, საქართველოს დამოუკიდებლობის დღესთან დაკავშირებით, საზეიმო ღონისძიებაში აღლუმის კომპონენტი არ იყოს ჩართული.
"სამხედრო აღლუმისგან, ალბათ, თავს შევიკავებთ, არ ვიცი, კიდევ როგორ გადაწყვეტენ. ჩემი დამოკიდებულება ასეთია, რომ ჩვენ არა ვართ ის ქვეყანა, რომ სამხედრო ძალა ვაჩვენოთ", - განაცხადა ივანიშვილმა და დასძინა, რომ აღლუმის და სამხედრო ძალის დემოსტრირების საჭიროება არ არსებობს.
