აფხაზეთის ავტონომიური რესპუბლიკის უმაღლესი საბჭოს თავმჯდომარე გია გვაზავა სააგენტო "ჯი-ეიჩ-ენთან" საუბარში "ოკუპირებული ტერიტორიების შესახებ კანონში" ცვლილების განხორციელებაში საგანგაშოს ვერაფერს ხედავს. თუმცა ხაზგასმით აღნიშნავს, რომ თავად "კანონი ოკუპირებული ტერიტორიების შესახებ უნდა მოქმედებდეს და მისი გაუქმება არავითარ შემთხვევაში არ შეიძლება.
"რაც შეეხება ცვლილებას, რომელიც შედის კანონში, ახლა ჩვენი საზღვრის გადაკვეთა პრაქტიკულად იმდენად ადვილია და მეხუთე კოლონა იმდენად თავისუფლად გრძნობს თავს საქართველოში, რომ ამით მაინცდამაინც დიდი საშინელება არ მოხდება", _ აცხადებს გვაზავა.
მისივე თქმით, ერთადერთი დადებითი რამ, რაც აგვისტოს ომს მოყვა არის ის, რომ ბოლოს და ბოლოს მთელმა მსოფლიომ ეს ტერიტორიები ოკუპირებულ ტერიტორიებად სცნო.
" ეს კანონი აუცილებლად უნდა იყოს. ეს არის სიმართლე, კანონი კი არ არის მხოლოდ - ეს არის სიმართლე მსოფლიოს წინაშე. ხოლო რაც შეეხება ცვლილებებს ვფიქრობ, რომ ეს ცვლილებები ძირითადად ეხება ჩვენს მოსახლეობას, იმიტომ, რომ ჩვენი მოსახლეობა ზარალდება, მათ იჭერენ და ა.შ. ამიტომაც ვფიქრობ, რომ ეს ცვლილებები საერთო დიდ ზიანს არ მოიტანს. ამით გამარტივება ხდება ჩვენი მოსახლეობისათვის. მე ასე აღვიქვი და საქართველოს მოქალაქეებზე ვსაუბრობ რომლებიც აფხაზეთსა და ცხინვალის რეგინში ცხოვრობენ თორემ ჯაშუში ისე მარტივად შემოვა, რომ მას დამიჯერეთ, არავითარი კანონი არ დასჭირდება",_ აცხადებს გია გვაზავა "ჯი-ეიჩ-ენთან" საუბარში.
