დავით ბაქრაძე იმედოვნებს, რომ წულუკიანის განცხადება აგვისტოს ომის ხელახალი გამოძიებისა და პრეზიდენტის დაკითხვის შესახებ მხოლოდ განცხადებად დარჩება. Aამის შესახებ, ჟურნალისტებთან საპარლამენტო უმცირესობის ლიდერმა დავით ბაქრაძემ იუსტიციის მინისტრის თეა წულუკიანის განაცხადების კომენტირებისას განაცხადა და აღნიშნა, რომ თეა წულუკიანი პოლიტიკური ბრძოლის ფარგლებში გაცდა ზღვარს, რომლის იქითაც სახელმწიფო ზიანდება
"2008 წლის ომთან დაკავშირებით ქართულმა მხარემ გამოძიება ჩაატარა. გახსოვთ მაშინ ეს პროცესი ღიად და გამჭვირვალედ მიმდინარეობდა. საპარლამენტო კომისიაში მისული იყო პრეზიდენტი და მან კომისიის მხრიდან დასმულ შეკითხვებს პასუხი გასცა. გარდა ამისა, ევროკავშირმა შექმნა მთელი საგამოძიებო სტრუქტურა ტალიავინის ხელმძღვანელობით, რომელიც შეხვდა ყველა მხარეს და დაიდო დასკვნა, რაზეც ყველამ თქვა, რომ იყო საკმარისი და ადეკვატური დასკვნა. ამის ფონზე ვერ ვხედავ რას უნდა ემსახურებოდეს ამ პროცესების ხელახალი გამოძიება. თუ ჩვენი ამოცანაა, რომ მაინცდამაინც ის დავამტკიცოთ, რომ ომი ქართველებმა დავიწყეთ, რომ ქართველები ტერორისტებს ვამზადებთ და ისეთი ცუდი სახელმწიფო ვართ, როგორც საქართველოს რუსეთის ზოგიერთი მაღალი თანამდებობის პირი აფასებს, მაშინ გასაგებია. ნამდვილად არ მინდა ვიფიქრო რომ იუსტიციის მინისტრის განცხადებების უკან ეს მიზანი დგას", - განაცხადა ჟურნალისტებს დავით ბაქრაძემ.
შეგახსენებთ, რომ თეა წულუკიანმა არ გამორიცხა, რომ აგვისტოს ომის საქმის გამოძიებასთან დაკავშირებით პრეზიდენტიც დაიკითხოს.