აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია სტრუქტურაში გარკვეული სახის ცვლილებებს არ გამორიცხავს.
როგორც მან დღეს "პრაიმ-ტაიმის" პრესკლუბში აღნიშნა, სამომავლო გეგმებზე საუბარი ცოტა გაუჭირდება, რადგან ამ თანამდებობისთვის არ ემზადებოდა.
მისი თქმით, აფხაზეთის პრობლემებს კარგად იცნობს, რადგან იქაურია და დევნილების პრობლემებზე უმუშავია.
"დევნილების პრობლემები ჩემთვის უცხო ნამდვილად არ არის. ზოგჯერ აქტიურად, ზოგჯერ კი ნაკლებად აქტიურად მათ პრობლემებს ვეცნობოდი და ამ პრობლემების შესახებ ზოგადად, წარმოდგენა მაქვს. დარწმუნებული ვარ, რომ სამომავლოდ ეს უნდა გამოვასწოროთ და ხალხს უნდა დავუახლოვდეთ", - განაცხადა ყოლბაიამ.
მისი თქმით, ხალხი იმდენად მიმტევებელია, თუ აუხსნი აუცილებლად გაიგებს.
ყოლბაიას განცხადებით, დღეს აფხაზეთის მთავრობის მიმართ ნდობა არ არსებობს და თანამდებობებზე სხვადასხვა კანდიდატების დანიშვნასთან დაკავშირებით, საზოგადოებას თავისი შეხედულებები აქვს.
"აფხაზეთის კონსტიტუციაში ჩაიწერა, რომ აფხაზეთის მთავრობას ათავისუფლებს ან ნიშნავს აფხაზეთის მთავრობა, პრეზიდენტთან შეთანხმებით. სანამ არ იქნება პრეზიდენტის თანხმობა, მოვალეობას მე შევასრულებ", - განმარტა ყოლბაიამ.
მისივე თქმით, აფხაზეთის მთავრობაში მენეჯერული თვალსაზრისით, მოვალეობათა და უფლებათა გადანაწილების კუთხით რეორგანიზაციაა საჭირო.
"რაღაცა რომ არასწორად მუშაობდა, ამიტომაც იყო საზოგადოება უკმაყოფილო აღნიშნული სტრუქტურის მიმართ. ძალიან დიდი ცვლილებები არ იქნება, მაგრამ გარკვეული რეორგანიზაცია იქნება", - განაცხადა ყოლბაიამ.
აფხაზეთის მთავრობის თავმჯდომარის მოვალეობის შემსრულებლად "დემოკრატიული მოძრაობის" გენერალური მდივანი ვახტანგ ყოლბაია გუშiნ დაინიშნა. შესაბამისი გადაწყვეტილება აფხაზეთის უმაღლესმა საბჭომ მიიღო.
ყოფილმა თავმჯდომარე გია ბარამიამ კი, აფხაზეთის ლეგიტიმური მთავრობის თავმჯდომარის თანამდებობიდან წასვლის შესახებ განცხადება 5 აპრილს დაწერა.
