პარლამენტის ვიცე-სპიკერი მანანა კობახიძე ამ ეტაპზე, დროებითი საგამოძიებო კომისიის შექმნის აუცილებლობას ვერ ხედავს.
როგორც მან დღეს "მაესტროს" პრესკლუბში სტუმრობისას აღნიშნა, საპარლამენტო უმრავლესობა ომბუდსმენის ანგარიშს ძალიან ყურადღებით გაეცნობა და მოისმენს.
მისი განმარტებით, იქნება საკომიტეტო მოსმენები და შემდგომ ანგარიშს პლენარულ სხდომაზე მოისმენენ.
"ერთი რამ მინდა გითხრათ, რომ ეს არ იქნება იმ ტიპის განხილვა, რაც წლების განმავლობაში იყო, როცა ომბუდსმენი თავის მრავალგვერდიან ნაშრომს დებდა და არანაირი რეაგირება ამას არ მოჰყოლია. მერე როდესაც ის ავადსახსენებელი ციხის კადრები გავრცელდა, "ნაციონალური მოძრაობის" ლიდერები გამოდიოდნენ და ამბობდნენ, რომ თურმე არ იცოდნენ რა ხდებოდა საქართველოს ციხეებში. სირცხვილია, როდესაც მათივე არჩეული სახალხო დამცველები ამ დასკვნებს დებდნენ და კონკრეტულ ფაქტებზე მიუთითებდნენ, ამის შემდეგ ისინი კიდევ აცხადებდნენ ურცხვად რომ არ იცნობდნენ", - განაცხადა კობახიძემ.
მისივე თქმით, წელს ასე არ მოხდება, რადგან ყველა ფაქტი იქნება რეაგირებული.
კობახიძე დარწმუნებულია, რომ დღეს პროკურატურას გააჩნია იმის რესურსი და რაც მთავარია არსებობს პოლიტიკური ნება, რომ პასუხისმგებლობის მიღმა არავინ დარჩეს.
"საგამოძიებო კომისიის აუცილებლობა დგება მაშინ, როდესაც შესაძლებელია პროკურატურა ან არ იძიებს ან ვერ იძიებს რატომღაც ასეთ საქმეებს, სხვა გზა აღარ არის და ჩნდება ის ბერკეტი, რომ შეიქმნას კომისია. დარწმუნებული ვარ, რომ ეს არის ისეთი საქმეები, რომლის გამოძიებაც უნდა შეძლოს და მოახერხოს პროკურატურამ. მიუხედავად იმისა, რომ ძალიან დიდი ადამიანური რესურსი სჭირდება ამ ყველაფერს", - განაცხადა მანანა კობახიძემ.
ამასთან, პარლამენტის ვიცე-სპიკერი არ გამორიცხავს, რომ პროკურატურაში არიან ადამიანები, რომლებიც შეიძლება თუნდაც, საბოტაჟს ეწევიან.
მისივე თქმით, არ არის გამორიცხული, რომ ვიღაცის ინტერესში შედის, რომ გამოძიება შეფერხდეს, მაგრამ ეს ფაქტები გამოძიებული უნდა იქნას.
"თუ რომელიმე პროკურორი არ ასრულებდა თავის მოვალეობას, ცხადია ისევ პროკურატურამ უნდა მოახდინოს რეაგირება. არ მგონია, რომ საპარლამენტო საგამოძიებო კომისიის შექმნის აუცილებლობა დადგეს, თუმცა, საჭიროების შემთხვევაში, შესაძლებელია ესეც განხირციელდეს. ამ ეტაპზე, მიმაჩნია, რომ ეს საქმეები არის პროკურატურის და შესაბამისი საგამოძიებო უწყებების მიერ გამოსაძიებელი, რომლებზეც სახალხო დამცველი გვითითებს", - განმარტა კობახიძემ.
სახალხო დამცველმა უჩა ნანუაშვილმა 1 აპრილს განაცხადა, რომ ყოველწლიურ ანგარიშში 28 აგვისტოს, სოფელ ლაფანყურთან ჩატარებული სპეცოპერაციის შესახებ ინფორმაციაა შესული.
მისი ინფორმაციით, შესაძლოა იკვეთებოდეს სერიოზული სისხლის სამართლებრივი დანაშაულის ნიშნები. საუბარია, მაღალი თანამდებობის პირების მხრიდან უკანონო შეიარაღებული ფორმირების შექმნის შესახებ.
აქედან გამომდინარე, სახალხო დამცველი საქართველოს პარლამენტს მიმართავს, შეიქმნას დროებითი საგამოძიებო კომისია, აღნიშნული ფაქტების შესწავლის მიზნით.