უწყებათაშორისი კომისიის თავმჯდომარე ტელევიზიებს რეკომენდაციას აძლევს და უფასო სარეკლამო დროის გამოყოფის ვალდებულებას ახსენებს.
უწყებათაშორისი კომისიის თავმჯდომარის რეკომენდაციას "ჯი-ეიჩ-ენი" უცვლელად გთავაზობთ:
თავისუფალი და სამართლიანი არჩევნების უწყებათაშორის კომისიას ერთ-ერთმა ოპოზიციურმა პარტიამ მიაწოდა ინფორმაცია იმის შესახებ, რომ ზოგიერთი ტელეკომპანია პარლამენტის შუალედურ არჩევნებზე მათი რეკლამის განთავსებაზე უარს ამბობს, რითაც კანონმდებლობით დადგენილ, უფასო საარჩევნო რეკლამის განთავსების ვალდებულებას არ ასრულებს.
საარჩევნო კოდექსის 51.5-ე მუხლის თანახმად, საერთო მაუწყებელს, აგრეთვე იმ მაუწყებელს, რომელიც საკუთარ ეთერში განათავსებს წინასაარჩევნო რეკლამას, აქვთ ვალდებულება, თითოეულ კვალიფიციურ სუბიექტს წინასაარჩევნო რეკლამის განსათავსებლად უსასყიდლოდ და არადისკრიმინაციულად ყოველ 3 საათში 90 წამის ოდენობით დრო გამოუყონ.
საარჩევნო კოდექსის 51-ე მუხლის მე-14 პუნქტი ასევე ადგენს, რომ უფასო სარეკლამო დროის გამოყოფის ვალდებულება შუალედურ არჩევნებზე ადგილობრივ მაუწყებელზე ვრცელდება. მაუწყებელთა შესახებ კანონის თანახმად, ადგილობრივი მაუწყებლობა არის კანონით დადგენილი წესით მაუწყებლობა, რომელიც ლიცენზიით განსაზღვრული მომსახურების ზონის მოსახლეობის არანაკლებ 90 პროცენტისთვის არის ხელმისაწვდომი.
უფასო პოლიტიკური რეკლამის განთავსების ვალდებულება წარმოეშვება ყველა იმ მაუწყებელს, რომელიც იმ გეოგრაფიულ არეალში მაუწყებლობს, სადაც პარლამენტის შუალედური არჩევნები ტარდება. საარჩევნო კოდექსის 51-ე მუხლის მიზნებისთვის ასეთი შეიძლება იყოს, როგორც ის მაუწყებელი, რომელიც მხოლოდ ადგილობრივად ბაღდათში, სამტრედიასა და თბილისში მაუწყებლობს, ასევე ის მაუწყებელიც, რომელიც მთელი საქართველოს მასშტაბით მაუწყებლობს და ადგილობრივად ფარავს იმ სამ რეგიონს, სადაც შუალედური არჩევნები ტარდება. სწორედ ამაში მდგომარეობს აღნიშნული რეგულაციის არსი.
უწყებათაშორისი კომისიის თავმჯდომარე მოუწოდებს კომუნიკაციის მარეგულირებელ კომისიას.
• ოპერატიულად შეისწავლოს და დროული რეაგირება მოახდინოს აღნიშნულ საკითხზე;
ამასთანავე კომისიის თავმჯდომარე მოუწოდებს მაუწყებლებს
• თავი აარიდონ კანონმდებლობის არასწორ ინტერპრეტაციას, რათა დაცული იქნეს საარჩევნო კანონმდებლობით გარანტირებული ეს უფლება და არ შეიქმნას მისი ხელყოფის ცუდი პრეცედენტი.