8-10 აპრილს, თბილისს ოფიციალური ვიზიტით ეწვევა ჩეხეთის რესპუბლიკის საგარეო საქმეთა მინისტრი კარელ შვარცენბერგი. იგი შეხვედრებს გამართავს საქართველოს პრემიერ-მინისტრთან ბიძინა ივანიშვილთან, საგარეო საქმეთა მინისტრთან მაია ფანჯიკიძესთან, სახელმწიფო მინისტრთან ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილთან და თავდაცვის მინისტრთან ირაკლი ალასანიასთან.
9 აპრილს ჩეხეთის რესპუბლიკის საგარეო საქმეთა მინისტრი კარელ შვარცენბერგი გვირგვინებით შეამკობს გმირთა მემორიალს და 9 აპრილს დაღუპულთა მემორიალს.
საქართველოს საგარეო საქმეთა მინისტრთან, მაია ფანჯიკიძესთან შეხვედრის შემდეგ, საგარეო საქმეთა სამინისტროში გაიმართება ხელმოწერის ცერემონია: „საქართველოს საგარეო საქმეთა მინისტრის მაია ფანჯიკიძის და ჩეხეთის რესპუბლიკის საგარეო საქმეთა მინისტრის კარელ შვარცენბერგის ერთობლივი განცხადება დიპლომატიური ურთიერთობების დამყარების 20 წლისთავთან დაკავშირებით." შეხვედრის დასრულების შემდეგ ორი ქვეყნის საგარეო საქმეთა მინისტრი ერთობლივ პრეს კონფერენციას გამართვას.
10 აპრილს, ვიზიტის ფარგლებში, დაგეგმილია საქართველო-ჩეხეთის ბიზნეს-ფორუმის გამართვა. ფორუმს საქართველოსა და ჩეხეთის საგარეო საქმეთა მინისტრები გახსნიან. ჩეხური მხრიდან ბიზნეს-დელეგაცია საკმაოდ წარმოდგენლობითია, რაც კიდევ უფრო გააღრმავებს ორმხრივ ურთიერთობებს ეკონომიკის კუთხით.
ვიზიტისას დაგეგმილია საქართველოსა და ჩეხეთის მთავრობებს შორის ეკონომიკისა და მრეწველობის სფეროში შეთანხმებაზე ხელის მოწერა. ქართული მხრიდან ხელს აწერს ეკონომიკისა და მდგრადი განვითარების მინისტრის მოადგილე მიხეილ ჯანელიძე, ხოლო ჩეხური მხრიდან მრეწველობისა და ვაჭრობის მინისტრის მოადგილე მილან ჰოვორკა. აღნიშნული ხელშეკრულება საქართველოში ჩეხური კომპანიებისა და ჩეხი ინვესტორების ეკონომიკური საქმიანობის შემდგომ გააქტიურებას დაუდებს საფუძველს.
