პარლამენტის ვიცე-სპიკერი მანანა კობახიძე არ გამორიცხავს, რომ 19 აპრილს დაგეგმილი აქციის მონაწილეების მიმართ ვინმეს პროტესტის გამოხატვის სურვილი გაუჩნდეს. როგორც მან "მაესტროს" პრესკლუბში აღნიშნა, მთავრობა 19 აპრილის აქციისთვის ნამდვილად მზადაა.
მისი თქმით, შესაძლო პროვოკაცია თუ ვინმეს აწყობს, ეს ისევ "ნაციონალურ მოძრაობას"აწყობს, იმიტომ, რომ შემდეგ ჩაგრულის და დევნილის მანტია მოირგოს.
"მერე ხმამაღლა იყვირონ დასავლეთში რომ თავს ესხმიან. ეს არ მოხდება. სრულად მობილიზებული იქნება სამართალდამცავი სტრუქტურები, პოლიცია იმისთვის, რომ რაიმე ექსცესები, რაიმე ინციდენტები არ მოხდეს. ყველას აქვს ამ ქვეყანაში გამოხატვის უფლება. თუკი "ნაციონალური მოძრაობის" მხარდამჭერებს გაუჩნდათ სურვილი, რომ მივიდნენ აქციაზე და არ ვიცი რა სიურპრიზებს ჰპირდება მათ ვანო მერაბიშვილი და მოისმინონ ამ სიურპრიზების შესახებ, ეს მათი უფლებაა", - განაცხადა კობახიძემ.
მისი თქმით, ხელისუფლება არავის ზღუდავს, თუმცა, ზედმეტი აჟიტირებაც არაა სწორი.
"ვფიქრობ, რომ ამაზე ბევრად საინტერესო მოვლენები ვითარდება ჩვენს ქვეყანაში და ამაზე რაღაც განსაკუთრებული ყურადღება გადავიტანოთ ეს ალბათ "ნაცების" ინტერესშია. რა თქმა უნდა ექნებათ გარანტირებული მშვიდობა. არ გამოვრიცხავ, რომელიმე მოქალაქეს მათ მიმართ პროტესტის გამოხატვის სურვილიც გაუჩნდეს, მაგრამ სახელმწიფო ვალდებულია დემონსტრანტები დაიცვას", - აღნიშნა მანანა კობახიძემ.
ამასთან, კობახიძე დარწმუნებულია, რომ შსს ამას მოახერხებს და ისეთი არაფერი მოხდება, რომელიც შეიძლება ისევ "ნაციონალურ მოძრაობას" "სავაჭროდ" გამოადგეს.
19 აპრილს, "ნაციონალური მოძრაობის" მხარდამჭერი აქცია რუსთველის გამზირზე, 16:00 საათზეა დაგეგმილი.