საგარეო საქმეთა მინისტრი მაია ფანჯიკიძე არ აკონკრეტებს, აპირებს თუ არა სამინისტრო პრეზიდენტის თურქეთში ვიზიტის დროს, რაბათის თემასთან დაკავშირებით მიღებული შეთანხმებების შემოწმებას.
როგორც მან აღნიშნა, ყველა ქვეყანამ უნდა მოუაროს მის ტერიტორიაზე არსებულ ძეგლებს, თუმცა, კონკრეტული გადაწყვეტილებები კულტურის სამინისტრომ უნდა მიიღოს.
"კომენტარი ვერ იქნება აქ კულტურული მემკვიდრეობის ძეგლის სპეციფიკაზე, რადგანაც ეს არის კულტურის სამინისტროს პრეროგატივა. ზოგადად კკი, ჩემი მიდგომა ამ საკითხის მიმართ ასეთია, რომ ორივე ქვეყანამ და საერთოდ, ყველა ქვეყანამ უნდა მოუაროს თავის ტერიტორიაზე არსებულ კულტურულ ძეგლებს და შეინარჩუნოს მათი ისტორიული ფასეულობა, მიუხედავად იმისა, თუ ვის ეკუთვნის ის", - განაცხადა ფანჯიკიძემ.
მისი თქმით, ეს ეხება ქართულ ძეგლებს თურქეთის ტერიტორიაზე და ეს ეხება თურქულ ძეგლებს საქართველოს ტერიტორიაზე.
ფანჯიკიძის განცხადებით, რაც არის ჩვენს ტერიტორიაზე ჩვენ უნდა მოვუაროთ.
საქართველოს პრეზიდენტი მიხეილ სააკაშვილი თურქეთში ოფიციალური ვიზიტით 6 აპრილს გაემგზავრა. მან თურქეთის პრემიერ-მინისტრ რეჯებ ტაიპ ერდოღანთან შეხვედრა იმავე დღეს გამართა. შეხვედრაზე აღინიშნა, რომ რაბათის საკითხი ორივე ქვეყნის ურთიერთშეთანხმებით გადაწყდება.
