,,მე არ ვიქნები ის იუსტიციის მინისტრი, რომელიც ხელყოფს იმ საუკუნოვან ქართულ კულტურას, რომელიც მცხეთაში არსებობს", _ განაცხადა ჟურნალისტებთან შეხვედრისას იუსტიციის მინისტრმა თეა წულუკიანმა მცხეთაში იუსტიციის სახლის მშენებლობის კომენტირებისას.
თეა წულუკიანი არ გამორიცხავს, რომ მცხეთაში იუსტიციის სახლის მშენებლობის პროცესი შეჩერდეს. როგორც წულუკიანმა ჟურნალისტებთან განმარტა მისი სურვილია დაწყებული იუსტიციის სახლების მშენებლობის პროცესი დასრულდეს.
"კონსულტაციებს ვაწარმოებ ჩემს კოლეგა კულტურის მინისტრთან და თუ აღმოჩნდა, რომ მცხეთის იუსტიციის სახლი შენდება იქ იმ ლანდშაფტში და იმ ადგილას, რომელიც დაცულია იუნესკოს მიერ შემუშავებული წესებით, რადგან თქვენ იცით, რომ მცხეთა იუნესკოს სიაშია, თუ ეს ასე დადგინდება მე, რა თქმა უნდა, მომიწევს მივიღო გადაწყვეტილება მცხეთის იუსტიციის სახლის აშენების შეწყვეტის და უკვე ამოყვანილი კედლების კონსერვაციის შესახებ", -განაცხადა წულუკიანმა.