პარლამენტის ფრაქცია "ქართული ოცნება - რესპუბლიკელების" თავმჯდომარე დავით ბერძენიშვილის განცხადებით, ისტორიული ძეგლების აღდგენა სპეციალისტების აზრის გათვალისწინებით უნდა მიმდინარეობდეს.
როგორც მან აღნიშნა, მთავრობა რომ პრეზიდენტს წერილს მიწერს იმისი გადმოტანა პოლიტიკური შეხლა-შეოხლის მცდელობით ეს მორიგი ინტელექტუალური შეცდომაა.
"ვერ არის ვანო მერაბიშვილი კონკურენტუნარიანი ამ საკითხებში. უმრავლესობას შევთავაზებდი, მარინე მიზანდართან ერთად დებატებში დასხდნენ რაბათის თემებზე სასაუბროდ", - განაცხადა ბერძენიშვილმა.
საქართველოს პრეზიდენტის პრესსპიკერმა მანანა მანჯგალაძემ მასმედიის წარმომადგენლებს გუშინ ის დოკუმენტი გააცნო, რომელიც პრეზიდენტის ადმინისტრაციაში საქართველოს მთავრობიდან შევიდა.
დოკუმენტი მომზადებულია საგარეო საქმეთა და კულტურის სამინისტროების მიერ, არის გრიფით „ფრიად სასწრაფო" და შეეხება ქართული და თურქული ძეგლების დაცვას ორი ქვეყნის ტერიტორიაზე.
მანანა მანჯგალაძემ აღნიშნული დოკუმენტის რამდენიმე პარაგრაფი წაიკითხა, რომლებიც რაბათის ციხის ცვლილებებს ითვალისწინებს.
ამასთან, კულტურის მინისტრის პირველი მოადგილე მარინე მიზანდარი აცხადებს, რომ ხელისუფლება რაბათის ციხის დაშლას არ აპირებს. საუბარია მხოლოდ იმ შეცდომების გამოსწორებაზე, რაც კომპლექსის განახლების პროცესშია დაშვებული.