პარტია "ახალი მემარჯვენეების" ერთ-ერთი ლიდერი მამუკა კაციტაძე თბილისის საკრებულოს თავმჯდომარის გადაყენების საკითხს, ერთი მხრივ ძალაუფლების შენარჩუნების, მეორე მხრივ კი ძალაუფლების მოპოვების პროცედურულ ბრძოლად აფასებს. როგორც მან დღეს "პრაიმ-ტაიმის" პრესკლუბში აღნიშნა, გარკვეული პერიპეტიები თვითმმართველ ორგანოებზე ახალი არაა.
მისი თქმით, 1 ოქტომბრიდან თვითმმართველ ორგანოებში დაპირისპირება დაიწყო, რომელიც ლოგიკური პროცესია.
"ჩვენთან არის ასეთი გაგება, რომ ვინც არჩევნებს იგებს, ის იგებს ყველაფერს. არ არსებობს ხელისუფლების გადანაწილება. ეს ხედვა არსებობდა "ნაციონალურ მოძრაობაში". გახსოვთ ალბათ გამოთქმა "მოგებულს მიაქვს ყველაფერი". ეს პროცესი დაიწყო 1 ოქტომბრის შემდეგ და ზოგან სრულად განხორციელდა, ზოგან ნაწილობრივ", - განაცხადა კაციტაძემ.
მისი თქმით, თბილისის საკრებულოში "ნაციონალურ მოძრაობას" 39 დეპუტატით ჰქონდა უპირატესობა, 6 თვეში კი ძალთა თანაფარდობა შეიცვალა და მათ 3 დეპუტატი გამოაკლდა.
კაციტაძის განცხადებით, საკმარისია 3 დეპუტატი კიდევ დააკლდეს "ნაცმოძრაობის" ფრაქციას და საკრებულოს გადაყენების საკითხში ახალი ვითარება გაჩნდება.
"თავმჯდომარის გადაყენების საკითხის დაყენება ორივეს, საკითხის გადაწყვეტა კი ისევ "ნაციონალურ მოძრაობას" შეუძლია. "ნაცმოძრაობას" 26 დეპუტატი ჰყავს, საკითხის გადასაწყვეტად კი 24-ია საჭირო", - განმარტა მამუკა კაციტაძემ.
მისივე თქმით, წინა კვირას "ნაციონალურმა მოძრაობამ" საკრებულოს თავმჯდომარის გადაყენების საკითხი დააყენა, თუმცა ის ჩავარდა. ამით კი, მათ საკრებულოს თავმჯდომარის სამთვიანი ხელშეუხებლობა მიიღეს.
"თბილისის საკრებულოში წინა კვირას დაფიქსირდა ერთი მხრივ, ძალაუფლების შენარჩუნების და მეორე მხრივ, ძალაუფლების მოპოვების პროცედურული ბრძოლა. შეფასება ნეგატიურია, მაგრამ რეალური. მას უნდა შეხედო, როგორც პრაგმატულ რეალობას, როგორც რეალურმა პოლიტიკოსმა", - განაცხადა კაციტაძემ.
საკრებულოს 29 მარტის სხდომაზე პირველ საკითხად დაყენებულ თემას საკრებულოს თავმჯდომარის თანამდებობიდან გადაყენების შესახებ საკრებულოს წევრებმა მხარი არ დაუჭირეს.
სხდომაზე ფრაქცია ,,ნაციონალებმა" პირველ საკითხად საკრებულოს თავმჯდომარის თანამდებობიდან გადაყენების საკითხი დააყენეს, რასაც საკრებულოს სხდომაზე ხმაური მოყვა.