ხელისუფლება მზადაა ქვეყანაში არბიტრაჟის განვითარებას ხელი შეუწყოს, აღნიშნულის შესახებ განცხადებას საპარლამენტო უმრავლესობის ერთ-ერთი ლიდერი ვახტანგ ხმალაძე აკეთებს. ხმალაძეს, რომელსაც არბიტრაჟში მუშაობის საკმაო გამოცდილება გააჩნია დარგში არსებულ პრობლემებზეც საუბრობს და განმარტავს, რომ წლების უკან არასწორმა მიდგომამ ბაზარზე საკმაოდ ბევრი საარბიტრაჟო კომპანიები გააჩინა, რომელთა მიმართაც საზოგადოებაში ნდობა არ იყო.
"მას შემდეგ რაც პარლამენტის წევრი გავხდი, მოქმედი არბიტრი აღარ ვარ.თუმც მე ვარ ერთ-ერთი პირველი არბიტრაჟის - თბილისის საარბიტრაჟო პალატის დამფუძნებელი. რაც პარლამენტის წევრად ამირჩიეს, მე ჩემი უფლებამოსილება მინდობილ პირს გადავაბარე და ის უძღვება არბიტრაჟს და პრაქტიკასთან კონტაქტი აღარ მაქვს. თუმც მიუხედავად ამისა, კარგად ვიცი თუ რა პრობლემების წინაშე დგას ზოგადად არბიტრაჟის სფერო საქართველოში. პრობლემები კი ერთის მხრივ გამოწვეულია კანონმდებლობით, ხოლო მეორე მხრივ ამ კანონის შემოღებიდან სულ რაღაც 1-2 წელიწადში სოკოებივით მომრავლდნენ საკმაოდ დაბალი დონის არბიტრაჟები, მათ შორის ე.წ. "ჯიბის არბიტრაჟები". იქმნებოდა ფორმალურად დამოუკიდებელი არბიტრაჟები, თუმც სინამდვილეში ეს იყო მათი საკუთარი არბიტრაჟები და მათ გადაწყვეტილებებს საზოგადოება არ ენდობოდა.
ხელისუფლების მხრიდან იყო რიგი ცვლილებები შეტანილი "არბიტრაჟის შესახებ" კანონში, რომელმაც აშკარად გაართულა არბიტრაჟების საქმიანობა და შეამცირა მიმზიდველობა კერძო სამართლის იურიდიული პირებისთვის. ამან გაართულა ზოგადად კერძო არბიტრაჟების განვითარების პროცესი ერთის მხრივ, ხოლო მეორეს მხრივ გაზარდა დატვირთვა, რომელიც მოდის სასამართლოებზე ამას ვამბობ, რომ არბიტრაჟის ერთ-ერთი ფუნქცია გახლავთ ის, რომ სასამართლოს ჩამიცილდეს ეკონომიკური სახის დავების განხილვა, და ეს დავები განიხილონ, უფრო მეტი პროფესიონალიზმის მქონე პირებმა, ანუ პირებმა, რომლებიც თავად მოდავეთა მხრიდან იქნებიან შერჩეულნი და შესაბამისად უფრო მაღალი იქნება ნდობის ხარისხი ამ გადაწყვეტილებების მიმართ"- განმარტავს ვახტანგ ხმალაძე.
მისივე განმარტებით, მაშინ პრობლემები შეიქმნა არბიტრაჟის გადაწყვეტილების აღსრულების პროცესშიც.
"ხელისუფლების ერთ-ერთმა წარმომადგენელმა შემიძლია გითხრათ, რომ ჩვენ კარგად გვესმის ეს პრობლემა. და სურვილიც გვაქვს და მზად ვართ იმისათვის, რომ არსებული ხარვეზები გამოვასწოროთ, მაქსიმალურად დავუახლოვოთ ჩვენი კანონმდებლობა საერთაშორისო სტანდარტებს და შევუქმნათ ჩვენს საზოგადოებაში მოქმედ პირებს, პირველ რიგში ეკონომიკურ სუბიექტებს თამაშის ის წესები, რომელიც იქნება, მათთვის კომფორტული"- განმარტა ვახტანგ ხმალაძემ, რომელიც დღეს საქართველოს ბიზნეს ასოციაციისა და ევროპის საარბიტრაჟო პალატის ორგანიზებით გამართულ საერთაშორისო კონფერენციას "არბიტრაჟის პერსპექტივები საქართველოში; არბიტრაჟის როლი აღმოსავლეთ ევროპის ქვეყნებში და საერთაშორისო საარბიტრაჟო კონვენციების შესრულება ევროსაბჭოს წევრ ქვეყნებში" - დაესწრო.
აღნიშნული კონფერენციის მიზანი კი საქართველოში არბიტრაჟის პრაქტიკის მიმოხილვა და მისი განვითარების შემაფერხებელ პრობლემებზე მსჯელობა იყო.