პრემიერ-მინისტრ ბიძინა ივანიშვილის განცხადებით, დღევანდელობამ უნდა მოახერხოს და მომავალი ილია ჭავჭავაძის ნანატრ მომავლად უნდა აქციოს.
როგორც მან საგურამოში, წმინდა გიორგის ტაძრის გახსნისას განაცხადა, სიმბოლურია ის, რომ დღეს ილიას მამულთან ახლოს ახალი ტაძრის კურთხევას ესწრება.
"ახალმა მთავრობამ, ჩვენმა შვილებმა, მეც პირადად პრეტენზია მაქვს იმისა, რომ უნდა მოვახერხოთ და "აწმყო თუ არა გვწყალობს, მომავალი ჩვენია". ეს მომავალი, დღევანდელობამ უნდა ვაქციოთ ილიას ნანატრ მომავლად. უნდა გვეღირსოს ჩვენ, უნდა მოვრჩეთ ამ მოჯადოებულ წრეზე სიარულს და ილიას ოცნება ჭეშმარიტად უნდა ახდეს", - განაცხადა ივანიშვილმა.
მისივე თქმით, უახლოეს წლებში უნდა მოვახერხოთ ჩვენი ერის, ჩვენი საქართველოს აღორძინება.
პრემიერმა ასევე, ტაძარში შეკრებილ მრევლს დღევანდელი დღე და ტაძრის გახსნა მიულოცა.
ბიძინა ივანიშვილი დღეს, მეუღლესთან ერთად საგურამოში წმ. გიორგის სახელობის ეკლესიის გახსნას დაესწრო. საგურამოში პრემიერ-მინისტრთან ერთად იმყოფებოდნენ საპარლამენტო უმრავლესობის და მთავრობის წევრები.
