უწყებათაშორისმა კომისიამ დღეს გამართული შეხვედრის შესახებ ოფიციალური ინფორმაცია გაავრცელა.
"პოლიტიკურ პარტიებთან და არასამთავრობო ორგანიზაციებთან თავისუფალი და სამართლიანი არჩევნებისათვის უწყებათაშორისი კომისიის შეხვედრაზე "ერთიანი ნაციონალური მოძრაობის" წარმომადგენელმა ყურადღება საარჩევნო პროცესში ჩართული მათი აქტივისტების საგამოძიებო ორგანოებში მასობრივ დაბარებებზე გაამახვილა.
"ერთიანი ნაციონალური მოძრაობის წარმომადგენელთა" განმარტებით, შემთხვევების უმეტესობა ძველი, მათ შორის 2000 წლის, საქმეების გამოძიებას შეეხება, რასაც "ნაციონალური მოძრაობა" შუალედურ არჩევნებში ჩართულ მათ აქტივისტებზე პოლიტიკურ ზეწოლად აფასებს.
მართალია, კომისიის კომპეტენციაში საგამოძიებო ქმედებების სამართლებრივი შეფასება არ შედის, მაგრამ იმისათვის, რომ პარლამენტის შუალედურ არჩევნებზე თანაბარი და სამართლიანი საარჩევნო გარემო იყოს უზრუნველყოფილი, უწყებათაშორისი კომისია რეკომენდაციას აძლევს საქართველოს მთავარ პროკურატურას უზრუნველყოს: 1 პარტიების მიერ წარდგენილ კანდიდატთა საგამოძიებო მოქმედებების ფარგლებში დაკითხვისაგან თავის შეკავება კენჭისყრის დღემდე, გარდა იმ შემთხვევისა, როდესაც საქმის მიმართ არსებობს მაღალი საზოგადოებრივი ინტერესი ან იქმნება საპროცესო ვადის დარღვევის საფრთხე. 2 კანდიადატთა დაკითხვისაგან თავშეკავების რეჟიმი ასევე გავრცელდეს შესაბამისი საარჩევნო ოლქის/უბნის შტაბის აქტივის წევრებზე, რომლებიც უშუალოდ არიან ჩართული წინასაარჩევნო კამპანიაში. ამ პირთა სია საქართველოს მთავარ პროკურატურას უნდა წარუდგინოს კანდიდატის პარტიამ/საარჩევნო ბლოკმა/ამომრჩეველმა საინიციატივო ჯგუფმა. სიაში შეყვანილ პირთა რაოდენობა უნდა იყოს გონივრული და შეესაბამებოდეს რეალობას. სია არ უნდა წარმოადგენდეს საგამოძიებო მოქმედებების ჩატარებისათვის თავის არიდებისა და ხელშეშლის საშუალებას", - ნათქვამია უწყებათაშორისი კომისიის განცხადებაში.
ამასთან, კომისიის თავმჯდომარე შეშფოთებულია საგამოძიებო ორგანოებში ოპოზიციური პარტიის აქტივისტების, საარჩევნო შტაბის ხელმძღვანელების და პარტიული კოორდინატორების ბოლო დროს გახშირებულ დაბარებებთან დაკავშირებით და მიიჩნევს, რომ ყველაფერი უნდა გაკეთდეს, რათა საგამოძიებო ქმედებები საარჩევნო პროცესში ჩართულ ოპოზიციის აქტივისტებზე ზეწოლის მექანიზმად არ შეფასდეს.
"ერთიანი ნაციონალური მოძრაობის" ინფორმაციით, ამ თვალსაზრისით განსაკუთრებული აქტივობა იმ რეგიონებში შეიმჩნევა, სადაც პარლამენტის შუალედური არჩევნები იმართება. აღნიშნულ პირთა საგამოძიებო ორგანებში დაბარების ფაქტები სამართლიანი არჩევნებისა და დემოკრატიის საერთაშორისო საზოგადოების (ISFED) დამკვირვებლებმაც დაადასტურეს.
იმისათვის, რომ თავიდან იქნეს აცილებული საგამოძიებო ქმედებების საარჩევნო პროცესში ჩართულ ოპოზიციის აქტივისტებზე ზეწოლის მექანიზმად აღქმის შესაძლებლობა, უწყებათაშორისი კომისიის თავმჯდომარე მოუწოდებს საგამოძიებო ორგანოებს, უზრუნველყონ პარტიების მიერ წარდგენილ კანდიდატთა, საარჩევნო კამპანიაში ჩართულ აქტივისტთა ან მხარდამჭერთა მიმართ ძველ საქმეებთან დაკავშირებული საგამოძიებო მოქმედებების ფარგლებში დაკითხვისაგან თავის შეკავება, გარდა ახლადჩადენილი სამართალდარღვევებისა, რაც დაუყოვნებელ სამართლებრივ რეაგირებას საჭიროებს და ისეთი ვითარებებისა, როცა საპროცესო ვადის დარღვევის საფრთხე იქმნება.
ასევე რეკომენდაცია ეძლევათ სამართალდამცავი ორგანოების წარმომადგენლებს წინასაარჩევნო პერიოდში თავი შეიკავონ საგამოძიებო მოქმედებებისგან იმ პირთა მიმართ, ვინც ამა თუ იმ ფორმით აქტიურობს რომელიმე ოპოზიციური პარტიის მხარდასაჭერად, რათა გამოირიცხოს ძველი საქმეების გამოყენებით ოპოზიციური პარტიის წინასაარჩევნო კამპანიის ხელის შეშლის ან ხელისშეშლად აღქმის შემთხვევები", - ნათქვამია კომისიის მიერ გავრცელებულ განცხადებაში.