საქართველოს სავაჭრო-სამრეწველო პალატის მიერ ახლახანს გამოცხადებული ახალი სტრატეგია საარბიტრაჟო სასამართლოს დაფუძნებას ითვალისწინებს.
საქართველოს სავაჭრო-სამრეწველო პალატის ინფორმაციით, მიმდინარე წლის 29 მარტს, საარბიტრაჟო ინსტიტუციის ჩამოყალიბებასთან დაკავშირებით პირველი შეხვედრა გამართა სამუშაო ჯგუფმა, რომლის შემადგენლობაშიც არიან აღმასრულებელი ხელისუფლებისა და არასამთავრობო სექტორის წარმომადგენლები.
კერძოდ, ეკონომიკისა და მდგრადი განვითარების, ფინანსთა და იუსტიციის სამინისტროები, საქართველოს უზენაესი სასამართლოს, „საერთაშორისო გამჭვირვალება საქართველო"-სა და საქართველოს ადვოკატთა ასოციაციისეთიკის კომისიის წარმომადგენლები. სამუშაო ჯგუფის ხელმძღვანელია სავაჭრო-სამრეწველო პალატის პირველი ვიცე-პრეზიდენტი ლაშა ჩხენკელი.
პირველ სამუშაო შეხვედრაზე ჯგუფის წევრებმა განიხილეს საარბიტრაჟო სასამართლოს შექმნისა და მის შემდგომ ფუნქციონირებასთან დაკავშირებული საკითხები.
სავაჭრო-სამრეწველო პალატის არბიტრაჟი მსოფლიოში ბიზნეს-სუბიექტებს შორის დავების გადაწყვეტის ყველაზე სწრაფი და ეფექტური მექანიზმია. არბიტრაჟის ამგვარი სისტემა ამცირებს არაფორმალურ გარიგებებს და უზრუნველყოფს ბიზნესებს შორის დავების ურთიერთშეთანხმებით გადაწყვეტას.
