საქართველოს ახალგაზრდა იურისტთა ასოციაციის თავმჯდომარე კახა კოჟორიძე დღეს საღამოს, გენერალური ინსpექციის წარმომადგენლებს შეხვდება.
შს მინისტრის მოადგილე ლევან იზორიასა და კახა კოჟორიძის შეხვედრა ცოტა ხნის წინ დასრულდა.
როგორც კოჟორიძემ შეხვედრის შემდეგ განაცხადა, საია-ს ინფორმაციით, განადგურდა ძალიან მნიშვნელოვანი მტკიცებულება, რომელიც ინციდენტის დროს განვითარებულ მოვლენებს ასახავდა.
"ამ მომენტამდე არ ხდება იმ მნიშვნელოვანი ინფორმაციის ამოღება თუ როგორ მიდის სამოქალაქო ფორმაში ჩაცმული პოლიციელები იმ შენობაში, სადაც ეს ვიდეოთვალი არსებობდა. ამ კადრებში ჩანს ფიზიკური შეხლა-შემოხლის ფაქტი. აუცილებლად უნდა დადგინდეს იმ ორი პირის ვინაობა, რომლებმაც ბათუმის სახლის დირექტორს აღნიშნული ვიდეომასალის წაშლა მოსთხოვა", - განაცხადა კოჟორიძემ.
შსს-მ გუშინ მომხდარი ინციდენტის ამსახველი ვიდეომასალა გამოაქვეყნა. ჩანაწერში ჩანს, თუ როგორ დაარღვია "მერსედესის" მარკის ავტომანქანის მძღოლმა როინ ფარტენაძემ საგზაო მოძრაობის წესები და "ტოიოტას" მარკის ავტომანქანას, რომელსაც ვალერიან თელია მართავდა ავარიული სიტუაცია შეუქმნა.
"სათვალთვალო ვიდეოკამერით გადაღებულ კადრებში ჩანს, რომ აჭარის შსს-ს მთავარი სამმართველოს უფროსს, ახალგაზრდა იურისტთა ასოციაციის წევრებისთვის ფიზიკური შეურაცხყოფა არ მიუყენებია", - ნათქვამია შსს-ს განცხადებაში.
ინციდენტი გუშინ, ბათუმში მოხდა. საია-ს წევრები აჭარის სამმართველოს უფროსს ფიზიკურ ანგარიშსწორებაში ადანაშულებენ. ფაქტს უარყოფს ვალერი თელია.