გადაცემა "აქცენტებში" გამოთქმული მოსაზრებები საზოგადოებრივი მაუწყებლის სარედაქციო პოლიტიკის ნაწილს არ წარმოადგენს - ამის შესახებ საზოგადოებრივი მაუწყებლის მიერ გავრცელებულ განცხადებაშია ნათქვამი.
განცხადების თანახმად, 26 მარტს, ეკა კვესიტაძის საავტორო გადაცემა „აქცენტების" პირველი ნაწილის თემა „რა როლი აქვს ეკლესიას სოციალურად დაუცველების დახმარებაში და რამდენად წარმატებულად ასრულებს ამ როლს" აქტუალურ საკითხს წარმოადგენს.
"თუმცა გადაცემაში დასმულმა შეკითხვებმა გამოიწვია საზოგადოების გარკვეული ნაწილის უკმაყოფილება და აღშფოთება. გადაცემაში გამოთქმული მოსაზრებები არ წარმოადგენს მაუწყებლის სარედაქციო პოლიტიკის ნაწილს", - ნათქვამია განცხადებაში.
ამასთან, საზოგადოებრივ მაუწყებელში განმარტავენ, რომ „აქცენტები" ეკა კვესიტაძის საავტორო გადაცემას წარმოადგენს და მაუწყებლის ხელმძღვანელობა არ ერევა მის სარედაქციო დამოუკიდებლობაში.
