ვარშავაში, სკოლაში 21 წლის ქალმა დანით სამი ადამიანი დაჭრა. დაშავებულებს შორის ორი არასრულწლოვანია.
პოლონურ მედიის ცნობით, თავდასხმა ვარშავის პრაგის რაიონში, ერთ-ერთ საგანმანათლებლო დაწესებულებების კომპლექსში მოხდა.
„ოთხი წუთის შემდეგ პოლიცია უკვე ადგილზე იყო“, - განაცხადა პოლიციის კომისარმა იაცეკ ვიშნევსკიმ პრესკონფერენციაზე.
დაშავებულები ორი 17 წლის გოგონა და 24 წლის ქალია.
დაშავებულების სიცოცხლეს საფრთხე არ ემუქრება.
თავდამსხმელი საგანმანათლებლო დაწესებულების თანამშრომელმა გაანეიტრალა და სამართალდამცველებს გადასცა.
თავდასხმის მოტივი ჯერ დადგენილი არ არის.
„ვიცით, რომ თავდამსხმელი ამ სასწავლებელში სწავლობს. ხოლო პირი, რომელიც საავადმყოფოში გადაიყვანეს, დღეს აქ დოკუმენტების ჩასაბარებლად მივიდა. შესაბამისად, არ გვაქვს დასტური, რომ ამ ორ ადამიანს შორის რაიმე კავშირი არსებობდა“, - განაცხადა პოლიციის წარმომადგენელმა.
პოლონეთის პოლიციამ ბოლო დღეებში მაზოვიის სავოევოდოში, სკოლებში მომხდარი ტრაგიკული შემთხვევების გამო, ქვეყნის მასშტაბით თითქმის 50 ათას საგანმანათლებლო დაწესებულებაში შემოწმება ჩაატარა.
ამ დროისთვის სამართალდამცველებმა ქვეყნის მასშტაბით 76 ადამიანი დააკავეს და 230-ზე მეტი ინციდენტი დააფიქსირეს.
ხუთშაბათს, ვიშკოვის ოლქის სოფელ ლეშჩიდულ-ნოვინიში, დაწყებითი სკოლის ყოფილმა მოსწავლემ, 15 წლის მოზარდმა, დანით სამი ადამიანი დაჭრა. მათ შორის სკოლის თანამშრომელი და დირექტორი. ერთ-ერთი მათგანი გარდაიცვალა.
მანამდე პოლონეთის ქალაქ ოსტროლენკაში, სასწავლებლების კომპლექსზე თავდასხმის შედეგად ცხრა ადამიანი დაშავდა.
-ოსტროლენკის სკოლაზე თავდასხმის პარალელურად, ოთხშაბათს პოლიციამ ქალაქ სერპეცშიც ჩაატარა ოპერაცია, რომლის შედეგადაც კიდევ ერთი თავდასხმა აღკვეთა.
