არქტიკული ყინული, რომელიც ჩრდილოეთის ყინულოვან ოკეანეს ფარავს, მოსახლეობას ზამთარში გაყინვის საფრთხეს არიდებდა, თუმცა, ყინულის საფარმა დნობა დაიწყო, რამაც ჩრდილოეთ ნახევარსფეროში ანამალიური თოვა გამოიწვია. ამ თემაზე იყო საუბარი ამერიკის შეერთებულ შტატებში გამართულ სამეცნიერო კონფერენციაზე.
„არქტიკული ყინულის ფართობის შემცირება პირდაპირ კავშირშია ძლიერ თოვასთან ზამთარში და ანომალიურ სიცხესთან ზაფხულში, რაც ჩრდილოეთ ნახევარსფეროში ბოლო წლებია შეინიშნება", - ამის შესახებ „ლოს ანჟელეს თაიმსი" მეცნიერ სტივენ ვავრუსზე დაყრდნობით წერს.
მეცნიერი განმარტავს, რომ კლიმატის ცვლილებამ არქტიკაში ატმოსფეროში ჰაერის წნევის ცვლილებები გამოიწვია. „ახლა ვაწარმოებთ არქტიკის ახალ მდგომარეობაში გადასვლაზე დაკვირვებას. პროცესი იმდენად სწრაფად მიმდინარეობს, რომ უკვე 2020 წლისათვის არქტიკა ზაფხულში, შესაძლოა, სრულად იყოს გათავისუფლებული ყინულისგან", - აცხადებს მეცნიერი.
არქტიკა და ანტრაქტიდა მუშაობენ, როგორც გიგანტური კონდეციონერები და არეგულირებენ დედამიწაზე კლიმატის მდგომარეობას, თუმცა, უკანასკნელ წლებში ეს „ტრადიცია" დაირღვა, რაც მეცნიერთა განცხადებით, ანომალიური სიცხეების, წყალდიდობების, თოვის და ყინვების მიზეზი გახდა.