რეგიონული განვითარებისა და ინფრასტრუქტურის მინისტრი დავით ნარმანია საქართველოს პრეზიდენტ მიხეილ სააკაშვილის ბოლოდროინდელ განცხადებებს სიცრუეს უწოდებს.როგორც მან საგანგებო ბრიფინგზე აღნიშნა, ბოლო დღეების განმავლობაში, რეგიონებში სტუმრობისას სააკაშვილი აკეთებს განცხადებებს, რომელიც მოსახლეობის შეგნებულად შეცდომაში შეყვანას და იმ დაშვებული შეცდომების გადაფარვას ემსახურება, რომელიც მისი 9-წლიანი მართველობის პერიოდში ხდებოდა.
მისი თქმით, ისეთ პირობებში, როდესაც რეგიონებში სხვადასხვა ტიპის სამუშოები ინტენსიურად მიმდინარეობს, მიხეილ სააკაშვილი კვლავ საუბრობს იმაზე, რომ ახალი ხელისუფლება ხალხზე არ ზრუნავს.
მინისტრმა მსგავსი განცხადებების ერთ-ერთ მაგალითად, ბათუმში ე.წ ოქროსქვიშიანი სანაპიროს მოწყობის პროექტი დაასახელა.
"ჯერ კიდევ მიხეილ სააკაშვილის, როგორც საქართველოს მაშინდელი პრეზიდენტის ინიციატივით, ბათუმში დაგეგმილი იყო ოქროსქვიშიანი სანაპიროს გაკეთება, რომლის ჯამური ღირებულება შეადგენდა 200 მლნ ლარს. 200 მლნ ლარიდან 80 მლნ ლარით უნდა გაკეთებულიყო ოქროსქვიშიანი პლაჟი", - განაცხდა ნარმანიამ.
მინისტრის თქმით, ახალი ხელისუფლები პირობებში, აღნიშნული პროექტის მოდიფიცირება დაიწყო, შესაბამისად, დაიზოგება 80 მლნ ლარი, რომელიც სოციალურად გაცილებით უფრო მნოშვნელოვანი პრობლემების მოგვარებას უნდა მოხმარდეს.
მისი ინფორმაციით, იმ შემთხვევაში, თუ ოქროსქვიშიანი პლაჟი გაკეთდებოდა, მისი ყოველწლიური შენახვის ხარჯები 3 მლნ ლარზე მეტი იქნებოდა.
"მოვუწოდებ მიხეილ სააკაშვილს თავი შეიკავოს ცრუ ინფორმაციის გავრცელებისა და საზოგადოების შეგნებულად შეცდომაში შეყვანისგან. იმ შემთხევაში", - განაცხადა ნარმანიამ და დასძინა, რომ თუ პრეზიდენტი ან მისი ადმინისტრაცია არ ფლობს სათანადო ინფორმაციას შეუძლიათ სამინისტროში მივიდნენ ან შესაბამისი ინფორმაცია ვებ-გვერდიდან მიიღონ.
