ამერიკის შეერთებული შტატების სახელმწიფო დეპარტამენტი საქართველოს პარლამენტის მიერ მიღებულ საკონსტიტუციო ცვლილებებს მიესალმება. ამის შესახებ განცხადება აშშ-ის სახელმწიფო დეპარტამენტის პრესმდივნის მოვალეობის შემსრულებელმა პატრიკ ვენტრელმა გააკეთა.
განცხადების ტექსტში ნათქვამია, რომ მიღებული ცვლილებები საერთაშორისო საკონსტიტუციო ნორმებთან შესაბამისობაშია. ვაშინგტონი პოლიტიკურ კონსენსუსს მიესალმება და ულოცავს საქართველოს მთავრობას, საპარლამენტო უმრავლესობას და უმცირესობას ამ მნიშვნელოვან ნაბიჯს.
"გადაწყვეტილება გზას უკვალავს საქართველოში დემოკრატიის კონსოლიდაციას და ახლიდან აქცევს ყურადღების ქვეშ ბევრ ისეთ საკითხს, რომელთა წინაშეც დღეს მთავრობა დგას",- ნათქვამია განცხადებაში.
გარდა ამისა, სახელმწიფო დეპარტამენტი მოუწოდებს ყველა პოლიტიკურ ძალას საჯარო გამოსვლებში კონსტრუქციული, მომავალზე ორიენტირებული ტონის შენარჩუნებისკენ.
