რეგიონებში სტიქიის შედეგად მოსახლეობისთვის მიყენებული ზარალის დათვლა დღეიდან დაიწყება. როგორც საგანგებო შტაბში აცხადებენ, ზარალის დათვლა გამოდარების შემდეგ მოხდება.
აჭარის ავტონომიური რესპუბლიკის მთავრობის თავმჯდომარის არჩილ ხაბაძის განცხადებით, აჭარაში სტიქიის შედეგად, სარფში მეთევზე დაიღუპა, რომელიც სამძებრო სამუშოების მიუხედავად ჯერ ვერ იპოვეს.
"მიმდინარეობს ამ ეტაპზე სამძებრო სამუშაოები, თუმცა ჯერჯერობით მაშველები ვერ ახდენენ შტორმის გამო წყალში შესვლას. ხელვაჩაურში დათვლილი გვაქვს და პირველადი მონაცემებით, 93 სახლი ნაწილობრივაა დაზიანებული, ხოლო 9 სახლზე სახურავი მთლიანად არის ახდილი. დაახლოებით 100 000 ლარამდე გვექნება ზარალი", - განაცხადა ხაბაძემ.
სტიქიის შედეგების ლიკვიდაციაზე ხუთი სამინისტრო ერთობლივად იზრუნებს.
პრემიერ-მინისტრის დავალებით, გუშინ საგანგებო შტაბი შეიქმნა, რომელსაც ენერგეტიკის მინისტრი კახა კალაძე ხელმძღვანელობს.
შტაბში ფინანსთა მინისტრი ნოდარ ხადური, რეგიონალური განვითარების მინისტრი დავით ნარმანია, ჯანდაცვის მინისტრი დავით სერგეენკო, ასევე, შსს-სა და თავდაცვის სამინისტროს წარმომადგენლები არიან გაწევრიანებულნი.