ქვეყანაში და განსაკუთრებით აჭარის რეგიონში განვითარებული სტიქიური მოვლენების შედეგად შექმნილ ვითარებასთან დაკავშირებით, პრემიერ-მინისტრის დავალებით, აჭარის მთავრობა საგანგებო შტაბს ქმნის. შტაბის შემადგენლობაში შედიან: აჭარის მთავრობის მინისტრთა კაბინეტის წევრები, ბათუმის საკრებულოს თავმჯდომარე და შინაგან საქმეთა სამინისტროს აჭარის მთავარი სამმართველოს უფროსი. საგანგებო შტაბს აჭარის ა/რ მთავრობის თავმჯდომარე არჩილ ხაბაძე უხელმძღვანელებს.
შტაბი იმუშავებს საგანგებო რეჟიმში და დროულად მოახდენს ზარალის დათვლას და შესაბამისი ღონისძიებების გატარებას. შტაბის წევრები შესაბამისი სამსახურის თანამშრომლებთან ერთად სტიქიის ეპიცენტრებს ადგილზევე მოინახულებენ და საჭიროების შემთხვევაში, დროულად მოახდენენ რეაგირებას. აღსანიშნავია, რომ დაზიანებული ინფრასტრუქტურისა და ნაპირსამაგრი სამუშაოების განსახორციელებლად არ გართულდება ფინანსური რესურსების მოძიება.
აჭარის მთავრობის აპარატში ამუშავდა 24 საათიანი ხცელი ხაზი 27 20 01, რომელზეც იმ შემთხვევაში, თუ მათ რაიმე ზარალი მიადგება, მოსახლეობას შეეძლება დარეკვა და ინფორმაციის დატოვება. ასევე დაზარალებულ მოსახლეობას შეუძლია ისარგებლოს საგანგებო სიტუაციათა მართვის სამსახურის ცხელი ხაზის 112-ის სერვისითაც.
ბოლო მონაცემებით ძლიერმა ქარმა ქობულეთის მუნიციპალიტეტში დააზიანა 43 საცხოვრებელი სახლის სახურავი; ხელვაჩაურის მუნიციპალიტეტში 9 სახლის სახურავი მთლიანად და 93 სახლის სახურავი ნაწილობრივ; წუხელ ღამით შტორმმა დააზიანა ზღვის პირა ზოლი ქობულეთსა და ბათუმში. ქ. ქობულეთში მოსახლეობის ნაწილს არ მიეწოდება ბუნებრივი აირი. დატბორილია ზღვისპირა ქუჩები. ქ. ქობულეთის გარკვეულ ნაწილს წყლის მიწოდება შეუწყდა. ამჟამად მიმდინარეობს აღდგენითი სამუშაოები.