ჯანდაცვის მინისტრის დავით სერგეენკოს განცხადებით, სამედიცინო დაწესებულებებში, სტიქიის შედეგად დაზარალებული მოსახლეობის მიმართვიანობა არ გაზრდილა.
როგორც მან საგანგებოდ გამართულ ბრიფინგზე აღნიშნა, ქვეყნის ჯანდაცვითი სისტემა გამართულად მუშაობს და შეფერხება არც ერთი მხრიდან არ ყოფილა.
"არ გაზრდილა მომართვიანობა. ასე რომ, ყველა სამსახური გამართულად მუშაობს. რეზერვები საკმარისია და მზად ვართ იმისთვის, რომ ნებისმიერ გამოწვევას გავუმკლავდეთ", - განაცხადა სერგეენკომ.
პრემიერ-მინისტრ ბიძინა ივანიშვილის დავალებით, სტიქიის შედეგების სალიკვიდაციოდ საგანგებო შტაბი შეიქმნა.
შტაბს ენერგეტიკის მინისტრი კახა კალაძე უხელმძღვანელებს.
შტაბში ფინანსთა მინისტრი ნოდარ ხადური, რეგიონალური განვითარების მინისტრი დავით ნარმანია, ჯანდაცვის მინისტრი დავით სერგეენკო, ასევე, შსს-სა და თავდაცვის სამინისტროს წარმომადგენლები იქნებიან გაწევრიანებულნი.