ფინანსთა მინისტრის ნოდარ ხადურის განცხადებით, არსებობს რესურსი, რომ ამინდის გამოსწორებისთანავე, იმ პროექტების დაფინანსება დაიწყოს, რომელიც მოსახლეობის ზარალის აღსადგენად იქნება საჭირო.
როგორც მან საგანგებო ბრიფინგზე განაცხადა, ფინანსები გამართულია და მოსახლეობის დასახმარებლად პროექტების განხორციელება ხვალ დილიდან დაიწყება.
მისი თქმით, დაფინანსდება ნაპირსამაგრითი სამუშაოები აჭარასა და გურიაში, ასევე ის ზიანი, რომელიც მოსახლეობამ ან და ინფრასტრუქტურამ მიიღო.
"ამ თვალსაზრისით, ხვალ დილიდან უკვე დავიწყებთ აქტიურ მუშაობას. მე ვთხოვ საბანკო დაწესებულებებს ასევე გააქტიურდნენ, რათა არანაირი შეფერხება არ იყოს ფინანსური რესურსების მობილიზაციის თვალსაზრისით. კიდევ ერთხელ ვიმეორებ, საქართველოს ფინასთა სამინისტრო ისევე, როგორც მთელი მთავრობა მზადაა აქტიური მონაწილეობა მიიღოს პროცესის გამოსწორებაში", - განაცხადა ხადურმა.
პრემიერ-მინისტრ ბიძინა ივანიშვილის დავალებით, სტიქიის შედეგების სალიკვიდაციოდ საგანგებო შტაბი შეიქმნა.
შტაბს ენერგეტიკის მინისტრი კახა კალაძე უხელმძღვანელებს.
შტაბში ფინანსთა მინისტრი ნოდარ ხადური, რეგიონალური განვითარების მინისტრი დავით ნარმანია, ჯანდაცვის მინისტრი დავით სერგეენკო, ასევე, შსს-სა და თავდაცვის სამინისტროს წარმომადგენლები იქნებიან გაწევრიანებულნი.
