,,აჭარის ავტონომიურ რესპუბლიკაშია ყველაზე დიდი ზიანი ამ ეტაპისთვის, რაც ძლიერი ქარისა და შემდგომ შტორმის შედეგად არის გამოწვეული. ეს არის 150-ზე მეტი დაზიანებული სახლის სახურავი, მათ შორის 100 ხელვაჩაურის მუნიციპალიტეტის ტერიტორიაზე, 20 ქობულეთის მუნიციპალიტეტის ტერიტორიაზე. დაზიანებულია რამდენიმე სკოლის სახურავი. ქობულეთში თამარ მეფის ქუჩაზე 150-მეტრი ნაპირი ჩამოინგრა და სერიოზული პრობლემებია ნაპირდაცვასთან დაკავშირებით. დაზიანდა ასევე გარე განათლების მოწყობილობები", -განაცხადა ნარმანიამ, რომელიც სტიქიის შედეგად ოზურგეთში არსებულ დაზიანებებზეც ისაუბრა.

..ოზურგეთში, ურეკის ტერიტორიაზეა ასევე ერთ-ერთი ყველაზე მსხვილი პრობლემა ნაპირდაცვასთან დაკავშირებით. წყალმა გაიტაცა სამი ნავი", -განაცხადა ნარმანიამ და აღნიშნა, რომ სტიქიის შედეგად ოზურგეთში ასევე დაზიანდა ოთხი სკოლის, ერთი ადმინისტრაციული შენობისა და 90 ინდივიდუალური სახლის სახურავი.

მინისტრის განმარტებით, სტიქიამ დააზარალა შენობები გორშიც. ნარმანიას გაცხადებით გორის ტერიტორიაზე დაზიანდა 20-ზე მეტი მრავალსართულიანი კორპუსის სახურავი. ნარმანიას განცხადებით, დაზიანებული სახლების უმრავლესობას რესტავრაცია 2012 წელს წინასაარჩევნოდ უხარისხოდ ჩაუტარდა.

,,გორში საცხოვრებელი სახლის სახურავი დაეცა მანქანას და მძღოლი, რომელიც მანქანაში იჯდა საბედნიეროდ გადარჩა. მას მცირედი დაზიანებები აქვს და ჰოსპიტალში შესაბამისი მკურნალობა აღმოუჩინეს", -განაცხადა ნარმანიამ, რომელმაც თბილისის მასშტაბით არსებულ დაზიანებებზეც ისაუბრა.

,,თბილის მასშტაბით 60-ზე მეტი სახლია დაზიანებული. ძირითად ავლაბრის ტერიტორიაზე", -განაცხადა ნარმანიამ და აღნიშნა, რომ იმ ადამიანებს ვისაც სტიქიამ ზარალი მიაყენა პირველ რიგში ადგილობრივ თვითმმართველობებს უნდა მიმართონ, რომელებიც შემდეგ ინფორმაციას უკვე სამინისტროს მიაწვდიან.

ნარმანიას განცხადებით, სამინისტროში ამოქმედდა ცხელი ხაზი 2-51-07-74, სადაც მოქალაქებს შეეძლებათ დარეკვა და სტიქიით მიყენებული ზარალის შესახებ სამინისტროსთვის ინფორმაციის მიწოდება.