პრემიერ-მინისტრ ბიძინა ივანიშვილის დავალებით, სტიქიის შედეგების სალიკვიდაციოდ საგანგებო შტაბი შეიქმნა.
როგორც ენერგეტიკის მინისტრმა კახა კალაძემ საგანგებო ბრიფინგზე განაცხადა, შტაბს თავად უხელმძღვანელებს.
მისი თქმით, შტაბში ფინანსთა მინისტრი ნოდარ ხადური, რეგიონალური განვითარების მინისტრი დავით ნარმანია, ჯანდაცვის მინისტრი დავით სერგეენკო, ასევე, შსს-სა და თავდაცვის სამინისტროს წარმომადგენლები იქნებიან გაწევრიანებულნი.
"ვიცით რა მდგომარეობაა. ძლიერი ქარის გამო გარკვეული პრობლემები შეიქმნა ქვეყანაში, განსაკუთრებით რეგიონებში. თუ რაიმე, გარკვეული პრობლემები შეიქმნება დამატებით, ჩვენ მზად ვართ გვერდში დავუდგეთ ჩვენი ქვეყნის მოსახლეობას", - განაცხადა კალაძემ.
მისი თქმით, უამინდობის გამო ამ დროისთვის 100 000-მდე აბონენტია გათიშული.
"გათიშული იყო და ჯერჯერობითაც გარკვეული პრობლემები არის, 100 000-მდე აბონენტი. აქედან, 60 000 იყო "ენერგო-პრო ჯორჯიას" აბონენტი, 30 000 შიდა ქართლი, 30 000 იყო ასევე დასავლეთის მიმართულებით. კახეთის რეგიონს ჰქონდა პრობლემები - 17 000 აბონენტი იყო გათიშული. დედაქალაქის რაიონებსაც ჰქონდათ გარკვეული პრობლემები, მაგრამ ამ მხრივ ყველანაირი პრობლემა აღმოფხვრილია", - აღნიშნა ენერგეტიკის მინისტრმა.
რაც შეეხება დანარჩენ რეგიონებს, კალაძის განცხადებით, მიმდინარეობს აღდგენითი სამუშაოები და დღის ბოლომდე გარკვეული აბონენტების რაოდენობა ჩართული იქნება.
კალაძის განცხადებით, აღდგენით სამუშაოებს ძლიერი ქარი აფერხებს, თუმცა მინისტრი იმედოვნებს, რომ თუ ქარის სიმძლავრე დაიკლებს, ხვალ დღის ბოლომდე ყველა აბონენტს ელექტროენერგია აღუდგება.
მთელი ქვეყნის მასშტაბით ძლიერი ქარია. სტიქია უტევს სანაპირო ზოლსაც, სადაც 6-ბალიან შტორმს ერთი მეთევზის სიცოცხლე ემსხვერპლა.
დაზიანებულია რამდენიმე რეგიონის მოსახლეობაც. კერძოდ, ძლიერმა ქარმა სახლების სახურავები დააზიანა. წაქცეულია ხეებიც.
სინოპტიკოსები ქვეყნის მასშტაბით, გამოდარებას ხვალიდან ელოდებიან.