საქართველოს პრეზიდენტმა მიხეილ სააკაშვილმა ერთი წლის გოგიტა აბაშიძის გარდაცვალების ფაქტის გამო, მწუხარების ნიშნად, პრეზიდენტის ადმინისტრაციიდან სახელმწიფო დროშის დაშვების განკარგულება გასცა.
როგორც მან საგანგებო მიმართვისას აღნიშნა, ყველამ გაიგო ბათუმში შიმშილით გამოწვეული დაავადებებისგან ერთი წლის ბავშვი, გოგიტა აბაშიძის გარდაცვალება.
"აქ არ გამოვსულვარ იმისთვის, რომ ვიღაცას ბრალი დავდო, ვიღაცა დავადანაშაულო ხელაღებით. მიმაჩნია, რომ ყველა უნდა დავუფიქრდეთ და კარგად შევისწავლოთ ის რაც მოხდა. გაჭირვებულებისთვის დახმარების პროგრამა ჩემი პრეზიდენტობის პირველ წლებში ამოქმედდა და მე არასოდეს კმაყოფილი არ ვიყავი ამ პროგრამით, განსაკუთრებით აჭარის რეგიონში. ეს სიტუაცია რთული იყო წინა მთავრობის დროსაც და გარკვეული სირთულეები ახალი მთავრობის პირობებშიც წარმოიქმნა", - განაცხადა პრეზიდენტმა.
მისი თქმით, მას არაერთხელ გაუკეთებია განცხადება, რომ უამრავი ოჯახი რთულ პირობებშია და ამ პროგრამის მიღმაა დარჩენილი.
სააკაშვილის განცხადებით, ამ შემთხვევაში, ვინმეს დადანაშაულება არ იქნება სწორი.
"ერთადერთი, რაც მინდა - მინდა მოვუწოდო ახალი მთავრობის მინისტრებს იმავე მოწოდებით, რისკენაც ყოფილი ხელისუფლების მინისტრებს მოვუწოდებდი - ნუ ისხდებიან კაბინეტებში, გამოვიდნენ და იარონ ოჯახ-ოჯახ, შეისწავლონ გაჭირვებულების პრობლემები. ნუ დავადანაშაულებთ ვინმეს, რომ მათ საბუთი ვერ მოაგროვეს, ჩვენ უნდა დავეხმაროთ, უნდა ავუხსნათ, უნდა შევძლოთ ყველაფერი იმისათვის, რომ მომავალში ასეთი რამ აღარასოდეს გამეორდეს", - აღნიშნა სააკაშვილმა.
მისივე შეფასებით, 21-ე საუკუნის საქართველოში შიმშილით არავინ უნდა კვდებოდეს, მიუხედავად იმისა, რომ საქართველო მდიდარი ქვეყანა არაა.
პრეზიდენტის განცხადებით, არის საშუალება, რომ შიმშილით სიკვდილის პრობლემა არ იყოს, რადგან ეს დიდი ტრაგედიაა.
"მე გავეცი განკარგულება, რომ ჩვენი მწუხარების ნიშნად პრეზიდენტის სასახლეზე დავუშვათ დროშა, მაგრამ ეს არის გაკვეთილი ჩვენთვის, იმისა, რომ ყველამ ერთად ვიმუშაოთ რათა მომავალში რაიმე მსგავსი ფაქტი ავიცილოთ თავიდან და საქართველოს ყველაზე გაჭირვებულ ნაწილს მხარში დავუდგეთ. დღეს გაჭირვება არის საქართველოს ყველაზე მთავარი მტერი და თუ ყველანი ერთად დავდგებით, ჩვენ ამ მტერს აუცილებლად დავამარცხებთ და ამ პრობლემას გადავლახავთ", - განაცხადა საქართველოს პრეზიდენტმა.
ბათუმის დედათა და ბავშვთა ჯანმრთელობის დაცვის რესპუბლიკურ ცენტრში, 1 წლის გოგიტა აბაშიძე გუშინ გარდაიცვალა. როგორც სამედიცინო დაწესებულების ექიმები განმარტავენ, მასის დეფიციტი ქონდა. გოგიტა აბაშიძე 4 კილო და 200 გრამი დაიბადა და ერთი წლის შემდეგ იგივე წონა იყო.
