ძლიერმა ქარმა თბილისში, იუსტიციის სახლის სახურავის ერთი მონაკვეთი დააზიანა.
საგანგებო სიატუაციების სამსახურის ინფორმაციით, ერთ მონაკვეთში ჩაიწია თუნუქი, თუმცა, მათივე თქმით, დაზიანება სერიოზული არ არის.
ამ დროისთვის სახურავის დაზიანებული ნაწილის აღდგენითი პროცესი მიმდინარეობს.
ქარმა ისნის რაიონში წითელწყაროს პირველ შესახვევში, #10-ში საცხოვრებელ სახლს სახურავი გადახადა.
პრობლემები შეიქმნა ნუცუბიძის ქუჩაზეც. ქარმა ერთ-ერთ საცხოვრებელ სახლს სახურავი ახადა. წაქცეულია ხე, რომელმაც კიდევ ერთი სახურავი დააზიანა.
ქარის შედეგად, ასევე დაზიანდა დედოფლისწყაროს ქუჩაზე ერთ-ერთი საცხოვრებელი სახლის ზედა სართული. მას ქარმა სახურავი მთლიანად გადახადა.
ამ დროისთვის დედაქალაქში ძლიერი ქარია. მისი სიჩქარე ზოგან 28 მეტრ წამსაც აღწევს. ქარი განსაკუთრებით დედაქალაქის გარეუბნებში იგრძნობა.
მოსახლეობისთვის დასახმარებლად საგანგებო სიტუაციების სამსახურის თანამშრომლები საგანგებო რეჟიმში მუშაობენ.
სინოპტიკოსები ქარის სიჩქარის შემცირებას დღის მეორე ნახევრიდან ელოდებიან.
