საპარლამენტო უმცირესობის წევრი გიორგი ვაშაძე უმრავლესობას თვითმმართველობებზე ზეწოლაში ადანაშაულებს და პარლამენტის თავმჯდომარეს აღნიშნული საკითხით დაინტერესებას სთხოვს.
როგორც მან დღევანდელ ბიუროს სხდომაზე აღნიშნა, საკრებულოში უმრავლესობის მოპოვების მიზნით, კოალიცია "ქართული ოცნება" "ნაციონალური მოძრაობის" წევრებზე გავლენას ახდენს და მათ გადაბირებას შანტაჟისა და მუქარის გზით ცდილობს.
მისი თქმით, თბილისის საკრებულოში საკმაოდ რთული მდგომარეობაა, რადგან ბოლო ორი დეპუტატიდან, რომლებმაც ფრაქცია "ნაციონალური მოძრაობა" დატოვეს, ერთ შემთხვევაში საქმე სიმამრის ფინანსური დავალიანების ხელოვნურ თამაშთან გვქონდა, მეორე შემთხვევაზე კი, პირდაპირ ზეწოლაზეა საუბარი.
"გთხოვთ, რომ უახლოეს მომავალში მიიღოთ თბილისის საკრებულოს თავმჯდომარე და საკრებულოს წევრები, რომლებიც ძალიან კონკრეტულ ფაქტებს გეტყვიან, თითოეულ ფაქტს ზეწოლის თვალსაზრისით. როგორ აძლევენ კონკრეტულ ვადას - თუ ამ ვადაში არ გადმოხვალ მაშინ კონკრეტულ მოქმედებებს მოვიმოქმედებთ", - განაცხადა ვაშაძემ.
მისი ინფორმაციით, საკრებულოს წევრებს ამასთან დაკავშირებით ძალიან სერიოზული ფაქტები აქვთ.
ვაშაძე იმედოვნებს, რომ პარლამენტის თავმჯდომარის მხრიდან აღნიშნულთან დაკავშირებით კონკრეტული რეაგირება მოჰყვება, რათა ხელების გადაგრეხვის პოლიტიკა ერთხელ და სამუდამოდ დასრულდეს.
განცხადებას პარლამენტის თავმჯდომარე დავით უსუფაშვილმა უპასუხა და აღნიშნა, რომ ის საკრებულოს წევრებზე ზეწოლის ფაქტებით დაინტერესდება და შესაბამის რეაგირებასაც მოახდენს.
