საპარლამენტო უმცირესობის წევრი გიგი წერეთელი პარლამენტის თავმჯდომარის დავით უსუფაშვილის განცხადებას პოზიტიურად აფასებს.
როგორც წერეთელმა ბიუროს სხდომაზე განაცხადა, ცვლილებებთან დაკავშირებით უსუფაშვილის დღევანდელი განცხადება საკონსტიტუციო, სხვა განცხადებებისგან ძალიან განსხვავდება.
"გარკვეული შეფასებები გაკეთდა. ჩემი კოლეგები და მეც ძალიან პოზიტიურად ვუყურებთ დავით უსუფაშვილის განცხადებას, რომელიც რადიკალურად განსხვავდება იმ განცხადებებისგან, რომელიც ისმოდა მთელი ამ დღეების განმავლობაში. ძალიან ბევრი ჩვენთაგანისთვის მიუღებელი იყო და შეურაცხმყოფელიც, როდესაც აქცენტი კეთდებოდა იმაზე, რომ ვიღაც უჭერს დიქტატურას მხარს ამ ცვლილებებით", - განაცხადა წერეთელმა.
მისი თქმით, მთელმა ამ პერიოდმა აჩვენა, რომ უმცირესობას ერთიანი პოზიცია აქვს და ერთიანი პოზიცია რჩება კიდეც.
გიგი წერეთელის განცხადებით, ის შეთავაზება, რაცუმცირესობის მხრიდან გაკეთდა ძალიან ლოგიკური და აპრობირებული გზაა.
"ჩვენ რომ არ შემოგვეთავაზებინა ამის ჩატარება თქვენთვის, თქვენ უნდა ჩაგეტარებინათ და დარწმუნებულიყავით თქვენი ხმების რაოდენობაში. ეს ყოველთვის ასე ხდებოდა. არაერთხელ ჩაგვიტარებია ჩვენ სარეიტინგო კენჭისყრა ყველა მნიშვნელოვანი კენჭისყრის წინ. არაფერი გაუგონარი აქ არ ხდება", - აღნიშნა წერეთელმა.
პარლამენტი საკონსტიტუციო ცვლილებებს დღეის ნაცვლად, ხვალ განიხილავს. საპარლამენტო უმცირესობა აცხადებს, რომ ცვლილებებს "ნაციონალური მოძრაობის" იმდენი წევრის მხარდაჭერა ექნება, რამდენიც კოალიცია "ქართულ ოცნებას" კონსტიტუციური უმრავლესობისთვის დასჭირდება.
საჭირო ხმების დასადგენად კი, "ნაციონალური მოძრაობა" უმრავლესობას ე.წ სარეიტინგო კენჭისყრას სთავაზობს.
ამასთან, დავით უსუფაშვილმა აღნიშნა, რომ "ნაციონალური მოძრაობის" მხარდაჭერის გარეშე საკონსტიტუციო ცვლილებები ვერ გავა.