საქართველოს პარლამენტის დავით უსუფაშვილის განცხადებით, საკონსტიტუციო ცვლილებების მიღება "ნაციონალური მოძრაობის" მხარდაჭერის გარეშე ვერ მოხერხდება. როგორც მან აღნიშნა, არსებული მდგომარეობით, პარლამენტში 147 დეპუტატია, მათგან 53 კი, საპარლამენტო უმცირესობას წარმოადგენს.
მისი თქმით, კონსტიტუციური ცვლილებების მისაღებად კი, მინიმუმ 100 დეპუტატის ხმაა საჭირო.
უსუფაშვილის განცხადებით, თუ "ნაცმოძრაობას" საკუთარ რიგებში აქვს რაიმე გასარკვევი, მას შეუძლია ე.წ სარეიტინგო კენჭისყრა ჩაატაროს, თუმცა საკითხი, რომ საკონსტიტუციო ცვლილებებისთვის რამდენიმე ხმაა საჭირო, გარკვეულია.
"კონსტიტუციური ცვლილებები, ეს და ნებისმიერი სხვა მიღებული იქნება მხოლოდ იმ შემთხვევაში, თუ მას მხარს დაუჭერენ "ნაციონალურ მოძრაობაში" დღევანდერლი მდგომარეობით რიცხული პარლამენტის წევრები. ამიტომ, კითხვა იმის შესახებ, რომ რაიმე სარეიტინგო გამოკითხვაა ჩასატარებელი იმის გასარკვევად - საკონსტიტუციო ცვლილებები გადის თუ ვერ გადის უმცირესობის წარმომადგენელთა მხარდაჭერის გარეშე, ჩემი პასუხია, რომ ცვლილებები ვერ გავა", - განაცხადა უსუფაშვილმა.
მისი თქმით, სრულიად გარკვეულია ის პასუხი, რომ "ნაციონალური მოძრაობის" მხარდაჭერის გარეშე კონსტიტუციური ცვლილებები ვერ გავა.
ამასთან, უსუფაშვილი განმარტავს, რომ ეს პოლიტიკური პასუხი არ არის. ეს მათემატიკაზე და არითმეტიკაზე დამყარებული პასუხია.