„აღმოსავლეთ პარტნიორობის ფარგლებში" დღეს „ქორთიარდ მარიოტში" მიგრაციისა და თავშესაფრის პანელის მესამე სამუშაო შეხვედრა გაიმართა. ღონისძიება ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ გახსნა. სიტყვით გამოვიდა ევროკავშირის საერთაშორისო მისიის ხელმძღვანელი რობ როზენბერგი.
შეხევდრაზე განიხილეს რეადმისიის ხელშეკრულების შესრულების საკითხები და ისაუბრეს სამშობლოში დაბრუნებული საქართველოს მოქალაქეების რეინტეგრაციის ხელშეწყობაზე.
როგორც მინისტრმა დავით დარახველიძემ აღნიშნა, განხილულ საკითხებთან დაკავშირებით საქართველომ ბოლო წლებში მნიშვნელოვან პროგრესს მიაღწია და ევროკავშირთან უკვე დაწყებული მოლაპარაკებები სავიზო რეჟიმის ლიბერალიზაციის შესახებ.
„დევნილთა სამინისტროში წარმატებით მიმდინარეობს ევროკავშირის დაფინანსებული პროექტი „მიზნობრივი ინიციატივა საქართველოსთვის", რომლის ფარგლებშიც სამინისტროში 2011 წლიდან ფუნქციონირებს „მობილურობის ცენტრი". ცენტრის უმთავრესი ფუნქციაა სწორედ ემიგრაციიდან დაბრუნებული საქართველოს მოქალაქეების რეინტრგრაციის ხელშეწყობა, კერძოდ: გადაუდებელი სამედიცინო დახმარება, დროებითი განსახლების უზრუნველყოფა, პროფესიული გადამზადება, დასაქმების საკითხებში მაქსიმალური თანადგომა და მცირე ბიზნესის წამოწყების მხარდაჭერა. აღსანიშნავია, რომ საქართველოსა და ევროკავშირს შორის უკვე გაფორმდა ურთიერთ თანამშრომლობის არაეთი ხელშეკრულება, თუ შეთანხმება, მათ შორის „პარტნიორობა მობილურობისათვის", შეთანხმება „სავიზო რეჟიმის გამარტივებისა და რეადმისიის შესახებ". ასევე ჩვენი ქვეყანა აქტიურად მონაწილეობს ისეთ საერთაშორისო ფორუმებში, როგორიცაა „პრაღის დეკლარაცია" , „ბუდაპეშტის პროცესი" - აღნიშნა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ.
ევროკავშირის მიერ ორგანიზებულ შეხვედრას 17 ქვეყნის წარმომადგენელი დაესწრო. როგორც ევროკავშირის საერთაშორისო მისიის ხელმძღვანელმა რობ როზენბერგმა აღნიშნა, განხილული საკითხები მნიშვნელოვანია ევროკავშირის სტანდარტებთან დაახლოებისთვის.