შინაგან საქმეთა მინისტრის ირაკლი ღარიბაშვილის განცახდებით, მისთვის ყველაზე მტკივნეული იყო, როცა აღმოაჩინა, რომ პოლიციის თითქმის ყველა დანაყოფი იყო პოლიტიზირებული.
როგორც მან დღევანდელ პრესკონფერენციაზე აღნიშნა, პოლიციის რეფორმის ერთ-ერთი მთავარი დამფინანსებელი დღევანდელი პრემიერ-მინისტრი ბიძინა ივანიშვილია.
მისი თქმით, სწორედ ივანიშვილმა დააფინანსა პატრულის რეფორმა სრულად, იქნებოდა ეს ავტომანქანების შეძენა, ეკიპირება თუ სხვა.
"მაგრამ ყველაზე მეტად მტკივნეული რაც იყო ჩემთვის - აღმოვაჩინე, რომ ფაქტიურად ყველა დანაყოფი იყო უკიდურესად პოლიტიზირებული. თუნდაც პატრულს, რომელსაც აქვთ ყოველდღიური შეხება მოქალაქეებთან, რომლებიც არიან მათი იმედი, მათ უწევდათ ძალიან ხშირად პოლიტიკური დაკვეთების შესრულება", - განაცხადა ღარიბაშვილმა.
მისი თქმით, იგივე კონსტიტუციური უსაფრთხოების დეპარტამენტი, რომელიც რეალურად სულ სხვა რამეზე უნდა მუშაობდეს, მთელი ამ წლების განმავლობაში, რეალურად პოლიტიკურ მანქანად გადაიქცა.
ღარიბაშვილის განცხადებით, სწორედ ამიტომ უპასუხა საზოგადოების დაკვეთას და გააუქმა ე.წ კუდ-ი და მის ბაზაზე სახელმწიფო უსაფრთხოების სააგენტო შექმნა.
"მთავარია ის, რომ ნება არის განსხვავებული და დავალება არის განსხვავებული. დავალება არის ძალიან მარტივი - არავითარი პოლიტიკური დავალებები აღარ იქნება. ჩვენ ვემსახურებით ჩვენს ხალხს და ჩვენს ქვეყანას, განურჩევლად მათი შეხედულებებისა", - განაცხადა მინისტრმა და დასძინა, რომ თითქმის ყველა დეპარტამენტში კიდევ ბევრი რამ იყო მოუწესრიგებელი, თუმცა ისინი ყველაფერს ასწორებენ და ალაგებენ.
შს მინისრის განცხადებით, მისი მიზანია დაზიანებული კერები, მანკიერი მეთოდები აღმოაჩინოს და ებრძოლოს მათ.
