საპარლამენტო უმცირესობის წევრი სერგო რატიანი მიიჩნევს, რომ აგრარულ უნივერსიტეტს ავტორიზაცია გაუუქმდა, რის გამოც მომავალ წელს სტუდენტებს ვეღარ მიიღებს.
როგორც მან დღეს "პრაიმ-ტაიმის" პრესკლუბში განაცხადა, გაკეთებული გაცხადებების მიუხედავად, ფაქტია, რომ უნივერსიტეტს ავტორიზაცია შეუჩერდა, რაც ნიშნავს იმას, რომ ის გარკვეულწილად კანონგარეშეა.
"პრობლემა არის ის, რამდენიმე თვეში უნივერსიტეტმა რომც გაიაროს ავტორიზაცია ხელახლა, მომავალ წელს იქ მიღება არ იქნება, რადგან სტუდენტების რეგისტრაცია ახლა იწყება და უნივერსიტეტი ამ პროცესს გამოეთიშა", - განაცხადა რატიანმა.
მისი თქმით, ავტორიზაციის შეჩერების პირველი საფუძველი თურმე არის ის, რომ ბიბლიოთეკაში ვერ მოიძებნა 10 წიგნი.
რატიანია განცხადებით, მეორე საფუძველი არის გამოცხადებული კონკურსი, რომლის საფუძველზეც ერთის ნაცვლად უნივერსიტეტში ორი პროფესორი მივიდა.
"მესამე პრობლემაა ის, რომ სტუდენტები ამერიკული პროგრამით სომხეთში წავიდნენ სასწავლებლად. იქ მიიღეს კრედიტები, დაბრუნდნენ საქართველოში და ის კრედიტები უნივერსიტეტმა ჩაუთვალა", - აღნიშნა რატიანმა.
მისივე თქმით, ერთ-ერთი მთავარი ბრალდება ასევე, ბოლო წლების განმავლობაში, თანხის გადაუხდელობის გამო უნივერსიტეტიდან გარიცხული 600 სტუდენტი იყო.
რატიანის განცხადებით, აგრარული უნივერსიტეტი საგანმანათლებლო ცენტრი არ იყო. ის პრობლემური სასწავლებელი იყო, სადაც ადამიანები საშინელ გარემოში იყვნენ ჩაფლულნი.
"ეს იყო შეურაცხმყოფელი გარემო, სადაც ჩვენი პროფესორები მუშაობდნენ. ეს გარემო აღარ არის და მისი ერთ-ერთი შემქმნელი კახა ბენდუქიძეა. ამ ადამიანმა უდიდესი პროგრესი შეძლო და დღეს ამ პროგრესს ვაჩერებთ", - აღნიშნა რატიანმა და დასძინა, რომ თუ ხელისუფლება ვერ აცნობიერებს ამ კონკრეტული გადაწყვეტილებით რა ზიანი მიაყენა საზოგადოებას, ამ ყველაფრის გაცნობიერებაში უნდა დავეხმაროთ.
აგრარულ უნივერსიტეტს ავტორიზაციის საბჭომ ავტორიზაცია გუშინ, 9-საათიანი განხილვის შემდეგ შეუჩერა.