აჭარის მთავრობის მეთაურს რეგიონის საკანონმდებლო ორგანოში იბარებენ. როგორც სააგენტო "ჯი-ეიჩ-ენს" აჭარის უმაღლესი საბჭოს ფრაქცია "ნაციონალური მოძრაობის" ერთ-ერთმა ლიდერმა პეტრე ზამბახიძემ განუცხადა, უმცირესობამ არჩილ ხაბაძეს შესაძლოა მიმდინარე კვირის ბოლომდე მოუსმინოს, რადგანაც საზოგადოებაში უამრავი შეკითხვა დაგროვდა მთავრობის ხელმძღვანელსა და აჭარის ფინანსთა და ეკონომიკის ყოფილ მინიტრთან დაკავშირებით, უფრო ზუსტად კი გიორგი თავართქილაძის თანამდებობიდან "უცნაურ" განთავისუფლებასთან დაკავშირებით.
"არსებობს ძალიან ბევრი კითხვა გიორგი თავართქილაძის განთავისუფლებასთან დაკავშირებით. მიმდინარე ქრონოლოგიას თუ გადავხედავთ გამოვიდა ისე, რომ მინისტრმა არ იცოდა, რომ თანამდებობიდან იყო განთავისუფლებული და განცხადებაზე, რომელიც გახდა მისი პოსტიდან წასვლის საფუძველი მასზე განაცხადა, რომ ჩემი დაწერილი არ არისო. ანუ კითხვები არსებობს და ეს თემა აჭარაში სასაცილო თემად იქცა"- განაცხადა "ჯი-ეიჩ-ენთან" საუბრისას პეტრე ზამბახიძემ.
მისივე ინფორმაციით გამორიცხული არ არის, რომ უმცირესობამ მეორე მხარესაც ანუ გიორგი თავართქილაძესაც მოუსმინოს, თუ კი ყოფილი მინისტრისგან სათანადო სურვილი იქნება.
შეგახსენებთ, რომ აჭარის მთავრობის მიერ გაკეთებულ განცხადებაში, რომელიც რამდენიმე დღის უკან გაავრცელა ნათქვამია, რომ "აჭარის ავტონომიური რესპუბლიკის ფინანსთა და ეკონომიკის აწ უკვე ყოფილმა მინისტრმა გიორგი თავართქილაძემ განცხადება დაკავებული თანამდებობიდან გათავისუფლების შესახებ 2013 წლის 10 თებერვალს აჭარის მთავრობის თავმჯდომარის სამდივნოში პირადად დატოვა. აჭარის მთავრობის აპარატის კანცელარიაში აღნიშნული განცხადება 2013 წლის 13 თებერვალს დარეგისტრირდა. განცხადებაში მითითებულია, რომ თანამდებობის დატოვების მიზეზი არის ჯანმრთელობის მდგომარეობა.
ამა წლის 4 მარტს აჭარის მთავრობის თავმჯდომარემ გიორგი თავართქილაძის მოთხოვნა გათავისუფლების შესახებ #26-ე ბრძანებით დააკმაყოფილა. გათავისუფლების შესახებ ინფორმაცია გიორგი თავართქილაძეს თავად მთავრობის თავმჯდომარემ აცნობა. ამავე დღეს ბრძანება გადაიგზავნა აჭარის ფინანსთა და ეკონომიკის სამინისტროს კანცელარიაში და შესაბამისად, მათ მიერაც მოხდა ყოფილი მინისტრის ინფორმირება თანამდებობიდან გათავისუფლების შესახებ"..
