"ერთიანი ნაციონალური მოძრაობა" დაზღვევის სახელმწიფო პროგრამას აკრიტიკებს. როგორც ჯანდაცვის ყოფილმა მინისტრმა ზურაბ ჭიაბერაშვილმა "პოლიტიკოს" პრესკლუბში სტუმრობისას განაცხადა საყოველთაო დაზღვევა მხოლოდ მინიმალურ სამედიცინო მომსახურებას ანაზღაურებს და პრობლემას, პაციენტების გარდა, სამედიცინო დაწესებულებებსა და სადაზღვევო კომპანიებს უქმნის.
ჭიაბერაშვილის განაცხადებით, უმჯობესი იქნებოდა, თუ საყოველთაო დაზღვევა ეტაპობრივად, რისკ-ჯგუფების გათვალისწინებით განხორციელდებოდა და პირველ რიგში, ბავშვებსა და 40-დან 60 წლამდე ასაკის ადამიანებს დააზღვევდნენ, ოღონდ უფრო სრულფასოვანი სადაზღვევო პირობებით.
,,ახლა ორ მილიონ ადამიანს, თითქოს რაღაც მივეცით, მაგრამ სინამდვილეში არაფერი არ მიგვიცა. ამიტომ ჯობია გავაფართოვოთ რისკ ჯგუფები და პენსიონერები, რომელებიც ერთ-ერთი ყველაზე დიდი რისკ-ჯგუფია ჩვენ დავაზღვიეთ. ახლა ეს რისკ-ჯგუფი ნელ-ნელა უნდა დავწიოთ", -განაცხადა ჭიაბერაშვილმა.
შეგახსენებთ, რომ საყოველთაო დაზღვევა პირველი მარტიდან ამოქმედდა და იგი იმ კატეგორიის დაახლოებით ორ მილიონ ადამიანს შეეხო რომელიც არცერთი სადაზღვევო პაკეტით არ სარგებლობდა.