ვენეციის კომისიის დასკვნა საერთო სასამართლოების შესახებ კანონზე - ერთ საათში დოკუმენტის შინაარსი უკვე ცნობილი გახდება.
წინასწარი დასკვნა კანონპროექტთან დაკავშირებით კომისიას უკვე აქვს, დოკუმენტს იცნობს ქართული მხარეც. დღის მეორე ნახევარში დაიწყება განხილვა. იტალიაშია საქართველოს საპარლამენტო დელეგაციაც.
ვენეციაში გაემგზავრა საქართველოს უზენაესი სასამართლოს თავმჯდომარე და იუსტიციის მინისტრის მოადგილეც. გამგზავრებამდე კოტე კუბლაშვილმა "მოამბეს" ინტერვიუ მისცა. უზენაესი სასამართლოს თავმჯდომარე აცხადებს, რომ ამ თემაზე საუბარი ბიძინა ივანიშვილთან შეხვედრაზეც იყო და მოლაპარაკების გაგრძელება შესაძლებელია ვენეციის კომისიის დასკვნის შემდეგაც.
საერთო სასამართლოების შესახებ კანონში შესატან ცვლილებებთან დაკავშირებით ისევ განსხვავებული პოზიციები აქვთ უმცირესობას და უმრავლესობას. ოპოზიცია ამბობს, რომ არის დებულებები, რომელიც ეწინააღმდეგება ევროპულ სტანდარტს და ემსახურება პოლიტიკურ მიზნებს.
უმცირესობა მთავარ პრობლემურ საკითხად იუსტიციის საბჭოს დაკომპლექტების წესს ასახელებს, რომელიც, მათი განმარტებით, იუსტიციის საბჭოს ამჟამინდელი შემადგენლობის დაშლას გულისხმობს.
უმრავლესობა კი ამბობს, რომ მმართველი გუნდი დაელოდა ვენეციის კომისიის დასკვნას და შეგნებულად შეაჩერა საერთო სასამართლოების შესახებ კანონში ცვლილებების მიღება.
განსხვავებულია ექსპერტების შეფასებაც. მერაბ ტურავა კანონპროექტს იდეალურს უწოდებს და თვლის, რომ ეს სასამართლო ხელისუფლების დემოკრატიზაციისკენ წინ გადადგმული ნაბიჯია.
ექსპერტი განმარტავს, რომ კანონის ამოქმედების შემთხვევაში, სასამართლო ხელისუფლებაში მთელი ძალაუფლება რიგით მოსამართლეებს გადაეცემათ, თუმცა ამით იუსტიციის საბჭოს ფუნქციები არ დაირღვევა.
კანონპროექტის პრობლემურ და პოზიტიურ მხარეებზე საუბრობს ექსპერტი ოთარ კახიძე. მისი განცხადებით, ცვლილებების ამოქმედების შემდეგ სასამართლოს თვითმმართველობა გაფართოვდება, თუმცა, ამავდროულად ის ფიქრობს, რომ ეს არის სასამართლო ხელისუფლებაში პირდაპირი ჩარევაა. ოთარ კახიძე თვლის, რომ 4 წლით არჩეული იუსტიციის საბჭოს მოქმედი წევრებისთვის უფლებამოსილების შეწყვეტა დაუშვებელია.