როგორც პაიჭაძემ განაცხადა გამოძიებით დადგინდა, რომ ,, ბაჩანა ახალაიამ 2006 წლის გაზაფხულზე გადაწყვიტა გაექარწყლებინა მის მიერ ნასვამ მდგომარეობაში პატიმრების ცემის და დამცირების თაობაზე მასობრივი საინფორმაციო საშუალებებით გავრცელებული ხმები. ამ განზრახვის სისრულეში მოსაყვანად ბაჩანა ახალაიამ და გ. დგებუაძემ (ზედმეტსახელად "მასტერა") შეიმუშავეს გეგმა, რომლითაც საზოგადოების თვალში გაქარწყლდებოდა მასობრივი საინფორმაციო საშუალებებით გავრცელებული ხმები ახალაიას მიერ ნასვამ მდგომარეობაში პატიმრების ცემის და დამცირების შესახებ. ამ მიზნით ახალაია და დგებუაძე ახალიას კაბინეტში შეხვდნენ კანონიერ ქურდს პ. მამარდაშვილს და მას გააცნეს გეგმა, რომელშიც მონაწილეობა უნდა მიეღო პ. მამარდაშვილს. გეგმის მიხედვით, პატიმრების გასეირნების დროს, მას შემდეგ, რაც პატიმრები დატოვებდნენ საცხოვრებელ ფლიგელს, ე.წ. კანონიერი ქურდების პალატის წინ დაამონტაჟებდნენ ფარულ ვიდეო და აუდიო კამერას. ამის შემდეგ დაწესებულების დირექტორის განკარგულებით, აღნიშნულ დერეფანში ჩამოიყვანდნენ პატიმარ ზურაბ ვიბლიანს, რომელიც დაწესებულების კრიმინალურ წრეებში მოიაზრებოდა, როგორც დაწესებულების ე.წ. მაყურებელი. პ. მამარდაშვილს, როგორც კანონიერ ქურდს ფარული კამერის წინ ვიბლიანთან უნდა ესაუბრა დაწესებულებაში კრიმინალური ავტორიტეტებისათვის შექმნილ გაუსაძლის მდგომარეობაზე, რაშიც უნდა დაედანაშაულებინა ბაჩანა ახალაია. ამის შემდეგ კი, ახალაიას ხელოვნურად დისკრედიტაციის მიზნით, უნდა დაევალებინა, ზ. ვიბლიანისათვის, რომ მას შეერჩია რომელიმე გახმაურებულ საქმეზე საზოგადოებისათვის ასე თუ ისე ცნობილი პატიმარი, რომელიც იმავდროულად იქნებოდა მათთვის სანდო კაცი. ზ. ვიბლიანს ამ პატიმრისთვის უნდა შეეთავაზებინა, რომ საკუთარ სხეულზე მიეყენებინა რაიმე სახის მსუბუქი დაზიანება, შემდგომ ეჩივლა უფლებადამცავ ნანა კაკაბაძესთან და ამ დაზიანების მიყენებაში დაედანაშაულებინა ბაჩანა ახალაია. ახალაიას გეგმით, პ. მამარდაშვილსა და ზ. ვიბლიანს შორის შემდგარი საუბარი ჩაიწერებოდა ფარული კამერით. მას შემდეგ, რაც ზ. ვიბლიანის მიერ შერჩეული პატიმარი მიიყენებდა დაზიანებას და იჩივლებდა ნ. კაკაბაძესთან, რომელიც თავის მხრივ, ამ ფაქტს პრესაში და ტელევიზიაში გააცხადებდა, ამ მომენტში ბაჩანა ახალაია გამოაქვეყნებდა პ. მამარდაშვილსა და ზ. ვიბლიანს შორის შემდგარი საუბრის ვიდეო და აუდიო ჩანაწერს, რითაც საზოგადოებას მოატყუებდა, რომ მასზე გავრცელებული ხმები პატიმრებთან არასათანადო მოპყრობის თაობაზე ინსცენირებულია კრიმინალური ავტორიტეტების მიერ.
ბაჩანა ახალაია პეტრე მამარდაშვილს დავალების შესრულების შემთხვევაში დაჰპირდა დახმარებას უზენაეს სასამართლოში, სადაც მას გასაჩივრებული ჰქონდა ქ. თბილისის საქალაქო და სააპელაციო სასამართლოების მიერ მის მიმართ გამოტანილი გამამტყუნებელი განაჩენები. პ. მამარდაშვილი იძულებული იყო დათანხმებოდა შეთავაზებულ წინადადებას. მართლაც, ახალაიას გეგმისამებრ შედგა მამარდაშვილის შეხვედრა ვიბლიანთან, თუმცა ვიბლიანმა არც კი მოუსმინა მამარდაშვილს, ისე გაეცალა", -განაცხადა პაიჭაძემ და აღნიშნა, რომ გეგმის განხორციელების უზრუნველსაყოფად, ბ. ახალაიამ 2006 წლის 25 მარტს წერილით მიმართა საქართველოს გენერალურ პროკურატურას.

,,მან წერილში იცრუა, რომ თითქოს მოპოვებული ოპერატიული ინფორმაციის თანახმად, 2006 წლის 25 მარტს სამკურნალო დაწესებულებაში მოთავსებული "კანონიერი ქურდების" მიერ იგეგმებოდა არეულობის მოწყობა და პროკურატურისაგან მოითხოვა ნებართვა ფარულ ვიდეო და აუდიო ჩაწერაზე მსჯავრდებულთა და პატიმართა სამკურნალო დაწესებულებაში.საქართველოს გენერალურმა პროკურატურამ 2006 წლის 25 მარტს გამოიტანა დადგენილება ფარული ვიდეო და აუდიო ჩაწერის გადაუდებელი გამოყენების შესახებ. იმავე დღეს სამკურნალო დაწესებულების ე.წ. "ქურდების ფლიგელის" დერეფანში და კამერაში დამონტაჟდა ფარული კამერა.
ბ. ახალაიას მიერ შემუშავებული გეგმის მიხედვით, პატიმრების, მათ შორის პ. მამარდაშვილის პალატაში დაბრუნების შემდეგ დაწესებულების დირექტორის მ. სინაურიძის განკარგულებით პ. მამარდაშვილის საკანში შეიყვანეს პატიმარი ზურაბ ვიბლიანი, რომელმაც არ იცოდა მისი იქ მიყვანის მიზეზი, თუმცა მამრდაშვილმა ახალაიას დავალება არ შეასრულა და კამერის წინ არაფერი თქვა.
ფირის მოსმენის შემდეგ ბ. ახალაია დარწმუნდა, რომ პ. მამარდაშვილმა დავალება არ შეასრულა, გადაწყვიტა მისთვის და ზ. ვიბლიანისათვის ანგარიშის გასწორება. 2006 წლის 27 მარტს ღამის 01 საათზე იგი მეგის ქარდავასთან, რევაზ ჭარბაძესთან, მე-7 საპყრობილის დირექტორთან გიორგი ფოლადაშვილთან და სპეციალური დანიშნულების რაზმის რამდენიმე წევრთან ერთად მივიდა სამკურნალო დაწესებულებაში და მოითხოვა დირექტორის კაბინეტში დასჯის მიზნით მიეყვანათ მსჯავრდებულები პ. მამარდაშვილი და ზ. ვიბლიანი. მან ასევე მოითხოვა დირექტორის კაბინეტში ამავე დაწესებულების პატიმრების გიორგი ავალიანის და ლევან ცინდელიანის მიყვანაც, რომელთაც არავითარი საერთო არ ჰქონდათ პ. მამარდაშვილთან და ზ. ვიბლიანთან, თუმცა მათი გამოძახება ემსახურებოდა ახალიას განზრახვას, რომ შეენიღბა შეუსრულებელი დავალების გამო მამარდაშვილისა და ვიბლიანისათვის ანგარიშის გასწორების მიზანი. დირექტორის კაბინეტში შეყვანილ პ. მამარდაშვილს ბ. ახალაიამ აჩვენა მის ხელთ არსებული ვიდეოფირი და უთხრა, რომ დავალების შეუსრულებლობის გამო იგი უნდა დასჯილიყო. ამის შემდეგ მეგის ქარდავამ პ. მამარდაშვილს, მისი როგორც კრიმინალური ავტორიტეტის დამცირების მიზნით, სხვა პატიმრების თვალწინ დაუწყო თმების შეჭრა. შეჭრილ თმებს უწყობდა ჯიბეში. ამის შედეგ ახალაიამ პატიმრების გამოწვევის მიზნით რიგ-რიგობით ჰკითხა ზ. ვიბლიანსა და გ. ავალიანს თუ რა დღე, რა რიცხვი და რომელი წელი იყო, რაზედაც ავალიანმა მიუგო, რომ ეს თვითონ ახალაიამაც იცოდა. ამ პასუხზე ახალაიამ სახეში შეაფურთხა გ. ავალიანს. გ. ავალიანმა საპასუხოდ ახალაიას ხელი გაარტყა. ამის შემდეგ ბ. ახალაიამ, რ. ჭარბაძემ, მ. ქარდავამ და სპეცრაზმის თანამშრომლებმა დაუნდობლად სცემეს გ. ავალიანს, ზ. ვიბლიანსა და პ. მამარდაშვილს. პარალელურად, ბ. ახალაიამ რაციის საშუალებით სამკურნალო დაწესებულებაში გამოიძახა საჯელაღსრულების დეპარტამენტის სპეციალური დანიშნულებისრაზმი. ნაცემი პატიმრები გაათრიეს სამკურნალო დაწესებულების პირველი სართულის დერეფანში, სადაც ასევე მიიყვანეს პატიმარი ლევან ცინდელიანიც. ამის შემდეგ ისინი გაიყვანეს დაწესებულების ეზოში, სადაც სხვა პატიმრების დასანახად სასტიკად სცემეს. ბოლოს დაწესებულების საკონტროლო-გამშვები პუნქტის გავლით გაიყვანეს საბადრაგო ავტომანქანის სადგომზე. იქ პატიმარ ზ. ცინდელიანს დაეწყო ეპილეფსიის შეტევა. დაწესებულების მთავარი ექიმის მიერ პირველადი დახმარების გაწევის შემდეგ ისინი ჩასვეს საბადრაგო ავტომანქანაში და გადაიყვანეს სასჯელაღსრულების დეპარტამენტის N7 დაწესებულებაში. რამდენიმე ხანში იქვე გადაიყვანეს სამკურნალო დაწესებულებაში მოთავსებული საკმაოდ მძიმე მდგომარეობაში მყოფი პატიმრები მ. ზედელაშვილი და ნ. მახარაძე", _ განაცხადა პაიჭაძემ და აღნიშნა, რომ ბაჩანა ახალაიას და ადმინისტრაციის სხვა ხელმძღვანელთა ამგვარ უკანონო ქმედებას დაწესებულებაში განთავსებული პატიმრების მხრიდან მოჰყვა აქტიური პროტესტი რაც ციხის ბუნტში გადაიზარდა

,,კერძოდ, იმავე ღამით პატიმართა მღელვარებას ადგილი ჰქონდა მეზობელ N5 და N1 სასჯელაღსრულების დაწესებულებებში.
ამ დანაშაულის ჩადენის გამო ბაჩანა ახალაია ბრალდებულია სისხლის სამართლის კოდექსის 332-ე მუხლის მე-3 ნაწილის "ბ" და "გ" ქვეპუნქტებით (სამსახურებრივი უფლებამოსილების ბორატად გამოყენება) 2006 წლის მარტის მდგომარეობით, საქართველოს 1999 წლის რედაქციით", -აღნიშნა პაიჭაძემ.
შეგახსენებთ, რომ აქამდე ახალაიას ბრალად ედებოდა თავდაცვის სამინიტროს თანამშრომლებისთვის შეურაცხყოფის მიყენება. კერძოდ, პროკურატურის მტკიცებით, გამოძიებით დადგენილია, რომ 2011 წლის ოქტომბერში ავდაცვის მინისტრმა ბაჩანა ახალაიამ, თავდაცვის სამინისტროს გაერთიანებული შტაბის უფროს გიორგი კალანდაძესთან და მე-4 ბრიგადის მეთაურ ზურაბ შამათავასთან ერთად, თავდაცვის მინისტრის სამუშაო კაბინეტში ფიზიკური და სიტყვიერი შეურაცხყოფა მიაყენა 6 სამხედრო მოსამსახურეს. ამასთან. ბაჩანა ახალაიამ ერთ-ერთ სამხედრო პირს - შოთა ბედოშვილს - დანის ტარი თავში ჩაარტყა.
აღნიშნულის შემდეგ ბაჩანა ახალაიამ ზემოაღნიშნული სამხედრო მოსამსახურეები ვაზიანში დისლოცირებულ მე-4 ბრიგადაში გადაიყვანა. აქ, ბრიფინგის ოთახში მათ კვლავ სცემეს და მიაყენეს სიტყვიერი შეურაცხყოფა. ამის შემდეგ დაზარალებულთა ფიზიკური და სიტყვიერი შეურაცხყოფა გაგრძელდა მე-4 ბრიგადის პირადი შემადგენლობის, დაახლოებით 20-30 კაცის წინაშე, ეზოში (ე.წ. „პლაცზე") მოწყობილი სამხედრო მოსამსახურეების თვალწინ.
გატარებული ღონისძიებების შედეგად დაკავებული იქნენ ბაჩანა ახალაია, ზურაბ შამათავა და გიორგი კალანდაძე საქართველოს სისხლის სამართლის კოდექსის 333-ე მუხლის მე-3 ნაწილის „გ" ქვეპუნქტით გათვალისწინებული დანაშაულის ბრალდებით. კალანდაძეს სასამართლომ აღკვეთის ღონისძიების სახით გირაოს გადახდა, ხოლო ახალაიას - წინასწარი პატიმრობა შეუფარდა.