,,გამოწვეული ელჩები ხშირ შემთხვევაში საგარეო საქმეთა სამინისტროდან მიღებულ დავალებებს არ ასრულებენ", -განაცხადა ჟურნალისტებთან სამინისტროში გამართულ პრესკონფერენციაზე საგარეო საქმეთა მინისტრმა მაია ფანჯიკიძემ და აღნიშნა, რომ ისინი მთავრობის ახალი სტრატეგიის მიხედვით მოქმედებენ.
"იმ ელჩებს, რომელთა გამოწვევაც ჩვენ მოვითხოვეთ, შესაბამისი ვადა დაუწესდა, ზოგს პირველ მარტამდე, ზოგს 15 მარტამდე, ზოგს პირველ აპრილამდე და ისინი ჯერ არიან თანამდებობებზე. მე მინდა აღვნიშნო, რომ როგორც ჩანს, ჩვენი არჩევანი, კონკრეტულ ქვეყნებში შეგვეცვალა ელჩები, იყო სწორი. იმის მიხედვით, რა ინფორმაციებიც მოდის, სამწუხაროდ ისინი ძალიან ხშირ შემთხვევაში არ ასრულებენ სამინისტროდან მიღებულ დავალებებს. მაგალითისთვის, ერთ-ერთი ასეთი დავალება იყო მთავრობის 100 დღის ანგარიშის წარდგენა ადგილსამყოფელ ქვეყნებში. მე არ ვარ კმაყოფილი იმ მუშაობით, რომელიც ელჩებმა, ჩაატარეს თავიანთ ადგილსამყოფელ ქვეყნებში რომლებიც უკვე გამოწვეული არიან და იციან თავისი გამოწვევის თარიღი, ", - განაცხადა მაია ფანჯიკიძემ.
მისი თქმით, ელჩები არ სარგებლობენ იმით, რომ დარჩენილ დროში მაინც შეასრულონ ქვეყნისთვის სასარგებლო საქმე.
"დიდი გულისტკივილით მინდა აღვნიშნო, რომ როგორც ჩანს, ისინი ისევ რაღაც სხვა გავლენის ქვეშ არიან, ან ეს არის მიზანმიმართული სტრატეგია საქართველოს ახალი მთავრობის წინააღმდეგ", - განაცხადა მაია ფანჯიკიძემ.