საქართველოს პარლამენტის წევრი, ოთარ ჩრდილელი განცხადებას ავრცელებს, რომელსაც "ჯი-ეიჩ-ენი" გთავაზობთ უცვლელად:
"ძვირფასო თანამემამულენო, მინდა თქვენი ყურადღება შევაჩერო საქართველოში მიმდინარე პოლიტიკურ პროცესებზე. დღეს საბოლოოდ გაცხადდა, რომ სულ რაღაც ოთხი თვის ოპოზიციურ წარმონაქმნს - ,,ნაციონალურ მოძრაობას,, არ სურს კოჰაბიტაციის რეჟიმი. ჩვენ ყველაფერი შევთავაზეთ, ყველაფერზე დავეთანხმეთ რაც მათ ჩვეული პრეტენზიებით გამოთქვეს, მაგრამ თვალი დავხუჭეთ და ქვეყნის პოლიტიკურ სტაგნაციაში ყოფნას ვამჯობინეთ ღია, გახსნილი დიალოგი. თუმცა დესტრუქციის ჭაობში ჩაფლულ უმცირესობის ზოგიერთ წევრს და დემაგოგიის კილიმანჯაროზე მყოფ მათ პრეზიდენტს ,,მადა ჭამაში მოუვიდათ.,,
მინდა გამოვეხმაურო ტელეკომპანია ,,მაესტროში,, მომხდარ სამწუხარო ინციდენტს, ვფიქრობ ეს იყო ძალიან ცუდი ფაქტი. არ შეიძლება ,,ნაციონალური მოძრაობის,, წარმომადგენელი ასე აგდებული, დამცინავი ტონით ესაუბრებოდეს კობა დავითაშვილს, იმ კობა დავითაშვილს, რომელიც ამავე პარტიის აქტივისტებისაგან 3ჯერ იქნა ნაცემი.
ძვირფასო ,,ნაციონალური მოძრაობის,, წევრებო, თავის დროზე არ უნდა გექნიათ ყველაფერზე თავი ასკილივით, მაშინდელი ხელისუფლებისათვის. თქვენი ყოფილი პრემიერ-მინისტრი და ახლანდელი გენერალური მდივანი, გამოდის და იძახის 8 თებერვალი იყო ყველაზე მძიმე დღეო. რას მელაპარაკებით ბატონო მერაბიშვილო, ნუთუ წარსულის ხერხემალს და დღევანდელი ,,ნაცმოძრაობის,, ციცერონს დაგავიწყდათ-7 ნოემბერს, კეისარ-პომპეუს-კრასუსის ტრიუმვირატივით, რომ ჩამოიარეთ თქვენ, კირკიტაძემ და ბეგაშვილმა. სისხლითა და ცრემლით მორწყულ რუსთაველზე ნიღაბაფარებულმა, გამარჯვებული ომის მხედართავარივით, რომ ჩაიარეთ, მაშინ ათასობით ადამიანი მოიწამლა და იცემა. მაგრამ მაშინ არ გტკიოდათ, არ გესმოდათ ხალხის ტირილი. ქართველმა ხალხმა გააკეთა არჩევანი და უნდა შეეგუოს ყველა ამას, მინდა მოსახლეობას ვუთხრა, რომ რაც არ უნდა ირბინოს აღმა-დაღმა მერაბიშვილმა, მაინც მოუწევთ შეგუება. ,,ნაციონალური მოძრაობა,, ცდილობს თერმიდორელობას, ისინი რაღაც ბუზიდან სპილოდ გადაქცევის დონის თითიდან გამოწოვილ სკანდალებს ქმნიან, ხელოვნურად ახდენენ სიტუაციის დაძაბვას, რითაც მანიპულირებს შემდეგ მათი პრეზიდენტი და ამით ახდენენ ისინი ტორპედირებას დასავლეთზე. მუდმივად პროვოკაციებში დახელოვნებულო ძვირფასო ,,ნაცმოძრაობავ,, კოჰაბიტაცია ანუ თანაცხოვრება თქვენ არ გაწყობთ, კარგი ბატონო, მაშინ აკომოდაციას, შეთვისებას გთავაზობთ. ანუ ორივე მხარე ვრჩებით ჩვენს საბაზისო ინტერესებში, მხოლოდ ის აგრესია, რაც არის ესკალაციის წყარო შესუსტდეს. ამას გთავაზობთ ქვეყნის ინტერესებიდან გამომდინარე და თუ არც კოჰაბიტაცია, არც აკომოდაცია არ გინდათ, მაშინ ვიქნებით ისეთ მდგომარეობაში, როცა დაბალმა არ აიწია, მაღალმა არ დაიწია და დარჩნენ უკოცნელიო.
მერწმუნეთ ჩვენი ქვეყნის სიყვარულისთვის და პირადად თქვენთვის გთავაზობთ კოჰაბიტაციასაც და აკომოდაციასაც.
P.S.ობივატელის ენაზე შეგახსენებთ, ფიზიკის კანონს: რაც იწელება-აუცილებლად წყდება", - ნათქვამია განცხადებაში.